Mizoram Pradesh Congress Committee (MPCC) President Lalsawta chuan nakkum inthlanpui lo awm tur atana an manifesto pakhatna – ‘Tang Puiha’ (Mizoram Economic Development Initiative (MEDI)) chu kuthnathawktu, loneimi leh thalai tam zawkin eizawnna ngialnghet an neih theihna tur atana bitum bik a nih thu a sawi.
Zirtawpnia manifesto pakhatna tlangzarh inkhawm neih zawhah MPCC President room-ah thu thar thehdarhtute kawmin Lalsawta hian, Congress party-in Mizorama danglamna thlen theitu an ni tih a sawi.
Manifesto pakhatna chu ‘Tang Puihna’ an tih chhan sawiin, “Mihring ding chhuak tur hian tang lo hi puih an har a, an tan hi chuan kawng hrang hranga an dinchhuah theihna hi a awm teuh ni loin, kan hmu a ni. Remruatna fel tak kan nei a, tanpui an ngaihna zawnah zel hian sorkarin kan tanpui ang a, kan ramah hian eizawnna ngialnghet nei hi an lo tam dawn a ni,” a ti.
An sorkar laia kawng hrang hranga sorkarna an chelh laia an lo puih tawhte, an tum anga hlawhtling zo ta lo tam tak khai chhuah ngai an awm tih sawiin, “Kawng laklawha awm tam takte khai chhuah theih nana ‘Tang Puihna’ a nih angin, tang hlei thei lo, tan nachang hre lote pawh kan zirtir ang a, kan kaihruai ang a, kan theih ang tawkin sorkar hian an tana dinchhuah vena tur kan buatsaihsak dawn a ni,” a ti.
Lalsawta hian duh reng vang ni miah loin mihring hian taksa leh rilru lama harsatna, vanduaina tak tak vanga harsatna neite tan pawh an Tang Puihna hmang hian bawm siamsak an nih thu a sawi a. Tang Puihnaah hian ramri pel rak thlenga kal turin ruahmanna an siam thu leh an sorkar laia an ngaihtuah phak loh, tunlai khawl thiamna leh changkannaa thalaite rualawhnate thlengin an manifesto pakhatnaah hian an bilh lut niin a sawi.
Zawhna chhangin MPCC President Lalsawta hian, manifesto dang pawh an la tlangzarh zel dawn a. An tlangzarh hun tur erawh a sawi thei lo thung.