Aizawl : Larsap Hari Babu Kambhampati-a’n nimin khan Chhiahtlang khuaa sorkar laipui scheme PMUY atanga Gas connection nei thar te leh PMAY (U) atanga chenna in nei thar chhungkuate a tlawh a. An scheme dawn te tha an ti em tih te, heng scheme dawng tur hian harsatna an paltlang em tih leh an thil tawn te zawtin a titipui.
Larsap chuan Gas connection la neilo, neih tum te tan PMUY scheme buaipui naah harsatna an tawk em tih zawtin, beneficiary te chuan sorkar leh gas agency ten tha taka an dilna te an lo buaipuisak thu Larsap chu an lo hrilh a. PMUY scheme hnuaiah Gas connection nei thar tam tak an awm belh zel nia an hriat thu te pawh an lo hrilh.
PMAY (U) tanpuina atang chenna in sa thar te pawhin, sorkar tanpuinaa chenna in tha tak an nei thei ta chu lawmawm an tih thu Larsap chu an lo hrilh a ni.
Larsap chuan central atanga welfare scheme tam tak te leh social security scheme tha tak tak chungchangte chu tun aia nasa in mipui nawlpui hnenah zirtirna pek a la ngai tih a sawi a. “Heng hmalakna tha tak tak leh hamthatna awm thei te hi tunah hian a dawng tur zatin in an la dawn a rinawm loh” tiin, heng scheme kaihnawih department-a sorkar hnath- awkte leh banker ten mawhphurhna pawimawh tak hlen tur an nei tih a sawi bawk.
Nimin vek khan Larsap hian Sainik School Chhingchhip pawh tlawhin, sikul naupangte fuihna thu a sawi a. Sainik school Chhingchhip chuan India ram hmundanga Sainik school te aia danglam bikna a neih thu sawiin, Sainik school dang ten an entawn turin a vawikhatna atana leh a hmahruaitu ni turin hmeichhe naupangte luh tir an nih thu a sawi a. ” Hei hi a chhuanawm takzet a ni” a ti.
Sainik school chu khawi hmunah pawh school thabik an nih thu Larsap chuan sawiin, Sipai, Navy leh Airforce officer ni turin a bik takin heng schoolah te hian zirlaite zirtirna pek a nih thu a sawi bawk.
Principal report atanga a lan danin, Sainik School Chhingchhip hian kum 6 hmel a hmu mek a. Batch hmasaber (Class VI) te chu Class XI an ni mek. Sainik school-a lut tur hian All India entrance test paltlang a ngai a. Sikul naupang pakhat tana kum khat senso Rs nuai 1.85 vela chhut a ni. Kuminah Class VI ah mipa naupang 60 leh hmeichhe naupang 10 admission pek an ni mek a. Class IX ah erawh chuan mipa chauh admission pek niin, kumtin seat 10 a awm thin.
Lehkha zir leh a kaihhnawih (cocurricular activities) bakah zirlaite tan taksa insawizawina leh themthiamna chidang atana hmunhma – Football ground, Badminton court, Basketball court, Gynasium, Music room etc., he school hian a nei a. Swimming pool, parade ground leh sports facility tangkai tak tak buatsaih chhoh zel tum a ni bawk.
Principal chuan Mizoram sorkarin tanpuina a pek thin – GIA dinhmun, Ambulance te chi MRB-in CSR kaltlanga pek a tum thute, NCC te tana tangkai INSAS silai Home department in pek a tum thu te school tihphuisuina atana Ministry of Defence atangin Rs 99,96,000 a lo kal tur thu te a sawi a. An harsatna pahnih tui bill sang lutuk leh Electric chhit man sang lutuk chungchangte Larsap hnenah a lo thlen a. Larsap chuan kawlphetha a harsatna sutkianna turin campus chhungah Solar power generation plant bun turin thu a rawn a, tui bill chungchang pawh Serchhip DC office leh PHED ten chinfelsak turin hma an la mek tih a hrilh bawk a ni.