Manchester United in September thla an hman that avangin chawimawina an player-ten an dawng a. Manager Erik ten Hag leh forward Marcus Rashford te chuan Premier League Manager leh Player of the Month an dawng.
Kum 52 mi Ten Hag hian Ajax atanga a club thar a enkawl hnuah match hnihah tlawm nghalin bul tan mahse United in a hnuaia hmalam pan turin ke an pen tan a. League-ah a zawnin vawi li an chak.
August thla khan Liverpool leh Southampton an hneh hnuah September thlaah Leicester City leh Arsenal an hneh.
Kum 24 mi Rashford hian Arsenal lakah goal hnih a khung a. August a Liverpool an hneh tumin goal a khung. Hei chauh hi ni lovin Leicester City laka Jadon Sancho goal khung tur a siamsak a. Arsenal laka an goal hmahruai Antony goal khung tur a siamsak bawk.
English forward chuan, “September thla chhunga ka tana pawimawh ber chu goal ni lovin assist ka neih pakhat a ni a. Antony-a goal khung tur ka siamsak kha ka tan chuan a langsar hle. Kha goal kha chakna leh huaisenna min petu a ni a, player thar in inkhel pawimawh a goal a khung nghal kha a pawimawh tak zet.” tiin a sawi.
Hetihlai hian manager Ten Hag hi Sir Alex Ferguson hnua Manchester United manager he chawimawina dawng thei pahnihna chauh a ni a. January 2019 a Ole Gunnar Solskjaer hnua United manager in he chawimawina a dawn hmasak ber a ni.
Tottenham enkawltu Antonio Conte leh Bournemouth caretaker boss Gary O’Neil te khumin he chawimawina hi a dawng.