Tun season a Manchester khaw club pahnihte intawn hmasak ber Pathianni zanah a thleng dawn a. Hetah hian club pahnihten an defender pahnih an chhawr thei dawn lo.
Maguire hi England tan kar hmasa khan inkhel tura ko a ni a. Club lama a che tha lo chunga ko a ni chuan sawi a hlawh a. Germany nen an inkhelh tumin tihsual vawi hnih a neih avangin goal a lut ve ve a. England tantute ngeiin an au el.
Manchester United-ah Erik ten Hag chuan Lisandro Martinez leh Raphael Varane te a rin zawk avangin Maguire hi tun season-ah vawi thum chauh league-ah a la inkhel.
Manchester City defender John Stones pawh a inkhel dawn lova. Malpui tha hliam a neih avangin kar hnih a chawlh a ngai.
Kum 28 mi hian Germany an khelh tumin hliam a neih avangin minute 37 chauh a khel a. A hliam hi endik a nih hnuah ni 10 tal a chawlh a ngai dawn a ni.