Premier League football club Newcastle United chuan kum 18 mi Garang Kuol chu Australian club Central Coast Mariners atangin January a lalut turin inremna an ti fel.
Australian forward Kuol manah hian Magpies in Pound 300,000 an seng anga. A khelhdan a zirin an la pek belh thei ang.
“Australia a seilian mipa naupang tan chuan thil mak leh ropui a ni a. Premier League hi mi zawng zawngin an en ber a nih avangin hetiang hi kan thleng ve thei ang tih ngaihtuah ngam pawh a ni ngai lo.”
“Mahse hetiang zing ami a ka han tel ve ta tur hi, a mak ka ti a, a ropui ka ti hle.” tiin Kuol chuan a sawi.
Kar hmasa khan Kuol hian Australia tan a vawikhatnan football a khel a. Kum 1996 a Premier League star Harry Kewell hnua an ram tana inkhel thei naupang ber a ni a. Kumin June thla khan a professional contract hmasa ziak.
Kumtawp a Qatar a World Cup khelh tura Australia team a ko tel turin a hming a ri ring tan hle a. Tunhnaiah Mariners tan substitute bench atang vawi sarih dah luh niin goal li a khung a. Inkhel thlak danglamtu tangkai a ni thin.
Newcastle manager Eddie Howe chuan, “A che rang a, a tlanchak. Goal hmaah a hriam em em a, insiamrem zung zung a thiam hle. Player tha ni turin theihna hrang hrang a ngah. Enkawl uluk a ngai dawn a, tun atanga reilote ah Premier League khel turin a inpeih ang.” tiin a sawi.