Siaha Bawrhsap Pisa kum 50 tlin lawmna nimina Circuit house complex, Siaha-a neiah bialtu MLA, Minister of State Dr K Beichhua bakah Palak bialtu MLA KT. Rokhaw khuallian leh khualzahawm niin an tel a. Dr K Beichhua-a’n Golden Jubilee plaque hawngin, Jubilee Souvenir a tlangzarh bawk.
Dr. K. Beichhua chuan “Mizorama Bawrhsap pisa lo ding hmasa pathum te kha Sap missionary ten awmhmun an lo khuarna hmunah vek a ni” tiin, Presbyterian kohhran dintu Sap missionary te thuthmun Aizawl, Baptist kohhran dintu Sap missionary te thuthmun Lungleiah leh ECM dintu Sap Missionary te thuthmun Saikao (Chhimtuipui)-ah te a nih thu a sawi a. “DC office,Siaha-in kum 50 hmel a lo hmu ta hi sorkar pisa pakhatin kum 50 hmel a hmu a ni ringawt lo, awmze ril tak nei a ni a, Pathian remruat kal zel a nih avangin Siaha mipui tan a hlu bik a ni”, a ti.
Siaha bialtu, Minister of State Dr k Beichhua chuan “Aizawl leh Lunglei DC office ten Golden Jubilee lawm nachang an hriatloh laia, Siaha-in ropui taka Golden Jubilee kan lawm bik hi kan Bawrhsap Lalsangliana leh a staff te thawhrimna vang a ni, an chungah lawmthu ka sawi” a ti a. Siaha khawpui chhunga DC office a awm theihna tura tha leh zung lo sengtu, mi hmasa leh senior politician te pawh lawmthu hrilhin, an in leh lo te DC office sakna atana hlantu Meisavaih mipuite chungah lawmthu a sawi bawk.
Dr K Beichhua leh KT Rokhaw ten Siaha Bawrhsap pisa Golden Jubilee lawmna puala inelna hrang hrang lawmman te an sem nghal a, Golden Jubilee ruai an kilho bawk a ni.