United States lama inkhuar KAM Sports group chuan Premier League club Everton chu lei an la duh reng niin thu a thang mek.
Kumtir khan KAM Sports Group hi Everton lei tum zingah telin Everton owner Farhad Moshiri nena inbiakna neite zingah an tel ngei a. Mahse an inbiakrem theih loh hnuah Moshiri hian an club chu zawrhlai a nih loh thu a sawi.
Mahse tunhnaiah KAM Sports hi intelkhawm zinga tel tawh lovin neitu mal ni turin hma an la a. English club hi lei ngei tumna an la nei.
KAM hi Minneapolis a sumdawng Kaminski chhungkua din a ni a. An KAM Sports bik hi khawvel huap a infiamna team tha te neitu ni a, hlawhtling tura enkawltu ni tura an duan a ni.
Kumtir khan Manchester United leh Chelsea club enkawltu lu lo ni thin Peter Kenyon-a hova intelkhawm zingah Kaminski chhungkua hi an lo tel tawh.
Tuna Everton neitupa Moshiri hian kum 2016 khan club neitu nihna changin Everton-ah hian a inseng nasa a, kum 2024-ah mi 53,000 lenna stadium tharah a insuanluhpui dawn. Tunhnai season thum chhunga Pound maktaduai 372 an hloh avangin club hi hralh mai a pawi ti dawn lo nia ngaihna a awm ve bawk.