BARAKHAIH
An beisei miah loh leh rin ngam miah lova thil han tihsak te, an phut vang pawh ni lem lova nangma chhia leh tha hriatna atanga present i pek te leh ei tur i eipuite hian an lawm thei em em a.
An rilru-ina a zawn mipa dik tak hmu taah an inngai hman hial thin a, i bula han khawsak chu vannei an inti thei hle bawk ang. Chu mai bakah, phone-a han biak zauh te hi an lawm tawp!
Mi tu emaw han baraikhaih (thil duhawm lam) hi thil tih harsa leh awlai lo tak a ni a, mahse thil theih loh bur erawh a ni hauh lo. Hmeichhiate hian i lakah thil tam tak an beisei lem lova, i phak tawk leh i neih tawka i enkawl kha an tan chuan a hlu em em tawh a ni.
THINLUNG TAKA FAK
Thil dang zawng zawng aia an duh leh mamawh ber chu, ‘ngaihsak’ nia inhriatna hi a ni a. Mi chapo tak leh âwm nem tak pawh ni mahse, a theihna leh thiamna hi mite’n hriatpui ve ngei se an ti thin. Special deuh nia inhriatna a rilrua i tuh theih phawt chuan lei ben thelh theih loh an sawi ang maiin bultanna tha tak i nei ngei dawn a ni.
Chutih rual rualin, i fakna leh ngaihpawimawhna kha a ve mai a ni tur a ni lova, thinlung chhung ril ber atanga chhuak a ni ngei tur a ni. Tunhnai mai khan ‘ka thau tawh e’ a tih pawhin a thawmhnaw inbel chu a inhmeh hle tia sawi daihte hi a fuh viau mai a, ‘I duhawm hle mai,” tihte leh ‘I chawhmeh siam hi ka kham thei mawlh lo’ tihte hian hna ropui tak an thawk thei.
PHONE CALL
‘Hello’ han tih emaw thil tih tum i hrilhin emaw i tlai tur thu leh thlen hun tur i hrilhte hi hmeichhiate hian an lawm em em a, phone call dawn hi hrehawm an ti lo tlangpui. Rei tak tak tlak duah a ngai kher lova, thumal tawi te emaw a dam leh dam loh han zawh mai ringawt pawh hi a tawk viau.
Puipunna hmun hlei hleia phone dawn hi (an buai viau loh chuan) nuam an ti thlawt thin a, sawi fo tawh angin, ngaihpawimawh leh duhsaktu an nei tih hi midangte pawh hian hre mai lovin hmu bawk se tih hi an duh ngawih ngawih a, an lawm zawng tak pawh a ni.
NGAIHPAWIMAWH
Thil tihna reng rengah an tel thei lo emaw an hman lo tih chiang sa-ah pawh han sawm der a, an hman leh hman loh han zawh te leh, an ngaihdan lak a, zawh zuaite hi an mahni-ah boruak tha tak mai a siam a. A hring a hranin inrawlhin, tel thei lo mahse ngaihpawimawh an nihna an hriat phawt chuan dinhmun duhawm takah i ding dawn tihna a ni ang.
Hriattur erawh chu- ngaihpawimawh hi an duh rual rualin, an mahni pawh hian hunthawl leh hunawl neih an duh ve thin thova, chuvang chuan a hun leh hmun hriat a tha. ‘Min ngaipawimawh lova, kei aia ngaihsak leh ngaihpawimawh i nei’ an tih tawh chuan hmakbak a eng vak lo tihna a ni a, fimkhur hle tur.
NGAIHVEN/NGAIHSAK
Hmeichhiate hian thil hote te pawh ni se, han sawi kual a, han sep vak vakte hi nuam an ti em em a, sawi tur a pui hi a ho emaw ho lo te thlengin an mahni tawk hian an pai fur hlawm a. Mahse, chungte chu lo dawngsawng a, ngaithla veng veng tur an hmuh zawh loh erawh chuan an hawi hil ve thei hle.
Chutih laia an thusawi te chil thli far lek leka ngaithla heuh heuhtu an awm erawh zawngin an hlim thei hle a. A khat tawka zawhna han zawh a, an thusawi tawhte pawh sawi chhuah leh a, a ngaithlatu-a i tang fo thin a nih chuan nakin-ah i la vai zai mai thei!
Hetah hian an thusawi ngaihthlak liam ringawt kha a ni lo. A inchei dan leh a kawr hak te kha sawi chhuah a, a inhmeh thu te, a bakilh leh a bengbeh mawizia han sawi chhuah zauh te hi inhmeh rem rem tak a ni a.
A thusawiah mai ni lo, a landan te i chik a, chu chu i sawi chhuak thin a nih chuan a khawvelah i tlatlum sawt ang.