Mizoram Upa Pawl (MUP) Sub-Hqrs, Hnahthial in Inrinni-a ‘Upate Ni’ an hman chu Mizoram Hmeichhe Insuihkhawm pawl (MHIP) Gen Hqrs President Ngutmawii Sailo in hmanpuiin, kum upate sawi nan ‘tar’ tih tawngkam hman chu thil tullo tak nia a hriat thu leh, tawngkam mawi zawk ‘upa’ tia sawi thin a duh thu a sawi.
Ngurmawii Sailo hian kum lama upa zawkte pawhin an tu leh fate hi an an puitlin zelna turin thu chhia leh tha hrilh kawngah mawh an phur tih a sawi a. “Kan tu leh fate hian upate thu hi kan inzirtirna a that chuan an pawm em em a. Hnam tinin upate hi kan thil kawl leh neih zawng zawng zinga hlu ber, an thu kan awih a, kan duat a, kan zah leh chawimawi thiam a tul hle a ni,” a ti.
MUP Hnahthial District President Khawlhmingliana kaihhruai inkhawm hi Conference Hall Market Building Hnahthialah neih a ni a, L.T. Rose Mary Hnamte, CDPO Hnahthial pawhin thu a sawi bawk.