Indore chu India-a a zawna a vawi ruk nan khawpui fai berah thlan a ni leh ta a. Ni tin bawlhhlawh ton 1,900 zet an neih chu sum siam nan leh tuialhthei atan an hmang thin.
Sorkar laipuiin kum tina faina survey a neih result chu Inrinni khan puan a ni a. Indore chu fai bera puan niin Surat leh Navi Mumbai ten an dawt.
A tlangpui thuin bawlhhlawh hi tawih thei leh tawih thei lova thliar thin a nih laiin Indore-ah hian chuan chi rukin an then a, a lak khawm leh sawngbawl pawh a hrangin an kalpui.
Madhya Pradesh-a khawpui lian ber, mihring nuai 35 vel chenna hi an state sumdawnna hmunpui a ni a, ni tin bawlhhlawh tawih thei lo ton 1,200 leh tawih thei ton 700 zet an nei.
Indore Municipal Corporation (IMC)-a cleanliness wing superintendent engineer Mahesh Sharma chuan, “Lirthei 850-in in tin leh sumdawnna hmun atangin bawlhhlawh hi kan la khawm a, category rukin kan sawngbawl,” a ti.
Lirtheiah hian compartment thenin bawlhhlawh an thliar dan azirin a dahna tur a awm hrang.
IMC-in bawlhhlawh tawih thei an thehthang dan hi bio-CNG plant lian tak ang a ni a, Asia-a a sawngbawlna lian ber niin thuneitute chuan an sawi.
February 19 khan Prime Minister Narendra Modi chuan ni tin metric ton 550 dawl zo plant, Rs. Vaibelchhe 150 man chu Devguradia trenching ground-ah a hawng a ni.