Indonesia-a football khelhna hmuna mipui inchilna thlengah mi 174 zet an thi a, khawvela khelmuala chhiatna thleng lian ber pakhat a tling.
Malang, East Java-a Arema FC-in tual chhunga an elpui an mikhualnaa khelmuala tawt taka mipui inhnawha chhiatna thlengah hian mi 180 chuang an inhliam.
Inchilna hi inkhel entu zing atanga khelmual tlan lut awmte police-in mittui tlakna hmanga an phuh atanga chhuak a ni.
Buaina a chhuah takah hian mi tam tak chiai chuan Kanjuruhan khelmual chhuahna lam an pan a, tam tak an thaw a chham a ni.
A tirah chuan mi 130 chuang thi anga puan a ni a; mahse, a hnuah thuneituten 174 an ti a, hliam tuar mi 11-te chu an na zual hle niin an sawi.
President Joko Widodo chuan Indonesia-a an league sang ber chu he thil thleng chhui fel a nih hma chu kalpui zui rih lo turin a ti.
Khawvela football thuneitu sang ber, Fifa chuan inkhelhna hmuna steward leh police-in mipui thunun nana mittui tlakna hman chu tih chi a ni lo tih an sawi.
Video thehdarhah chuan 2-3 a khelmual neitu lam an chak loh va inkhel a tawp rual chiahin anmahni tantute chu khelmual chhungah an tlan lut nghal a, police-in mittui tlakna nen an lo chhang let ve nghal tih a hmuh theih.
“Inthununna engmah a awm lo, officer an bei a, an car an tichhe bawk,” tiin East Java-a police chief Nico Afinta chuan a sawi a, police officer pahnih an thi tel tih a sawi.
“Mipui zawng zawng an ni lo va, khelmuala tlan lut chu 3,000 chuang chauh an ni ang,” a ti.
Inkhel entu tlanchhiate chuan chhuahna hmun an pan a, an inhnawh khawm tup tup a, thenkhat an thaw thei lo va, oxygen an tlachham ta niin officer chuan a sawi.
Social media-a video thehdarhah chuan hungna lawn liam tum lai te, chhuata thi tawh tih hriat tak mihring let rengte pawh hmuh tur a awm.
Indonesian football association (PSSI) chuan thil thleng chhui a nih tur thu leh Indonesian football hmel a tibal niin an sawi.
Indonesia-ah hian football khelhnaa buaina chhuak hi a awm fo va, Arema FC leh Persebaya Surabaya hi tun hma atang tawha inhal an ni bawk.
Tun tum inkhel turah pawh hian buaina chhuah hlauhna avangin Persebaya Surabaya tantute chu ticket lei phal an ni lo.
Chief Security Minister Mahfud MD chuan mi 38,000 lenna Kanjuruhan khelmualah hian ticker 42,000 zet hralh a nih thu Instagram-ah a tar lang.
President Widodo chuan Liga 1 inkhel chawlh tur a puan rualin he thil thleng hi an rama football-a chhiatna thleng hnuhnung ber a nih tawh tur thu a sawi.