- Rinfela Zadeng
A khuhhawnna
Ni khat a ral a, kum a lo vei a, mihring te leh he khawvel hi a lo danglam thin. Chatuana danglam ve ngai lo chu ‘HMANGAIHNA’ hi a ni.
Philosophy
September thla tawp lam nitain ka hria, Philosophy class kan kal a, kan bang chiah chu hmeichhe pakhat hian ka ‘note’ lak chu ‘copy’ min rawn dil a, ka pe a; chu chu kan vawikhat inbiakna a ni.
Ka rilruah a awm reng thin – ka ‘note’ min hawhsak ni kha; ka theihnghilh tawh ngai lo. Chuta tang chuan Philosophy class kan neih apiang chuan kan thu dun thin a. Philosophy class hi ni lenga kal mai ka duh thin.
I tan hian
Chhungte thawh chhuah sain harsa takin College ka kal ve a, ni tin bus-in ka kal thin. Ni tin eikhawp thawhchhuah angaih avangin College-a kala thawmhnaw nalh leh thar tha tak hak chu kan tan chuan thil theih a ni lo. Thawmhnaw chul tak hain khawpui nula nalh tak tak te nen College kan kal ho chu, te chem chem hian ka in hre thin.
I tan pawh khang hun lai khan han chhuan tlak ka nih lohzia kha ka hai ngai lo. Nang nena kan in anna awm chhun chu class khata kan thut dun chauh kha a ni tih ka hre reng thin. I bula thu ve tura min duh reng avang khan ka lawm em em thin.
Min hmangaih em?
He zawhna hian ka rilru a luah reng thin a! A chhanna ka hriat chak em em rualin ka huphurh em em bawk. Hmangaihna chauh i duh a nih chuan ka tling zo ve mai thei! Mahse thildang a tel a nih erawh chuan engmah ka nih lohzia chu kan pahnih leh mi dang zawng zawng te paw’n an hria tih ka hria.
I rilru tak tak hi ka hre thei loa, tunah hi chuan hmangaihna leh thil hlu dangte nena intlaksiakna khawvelah kan cheng tawh miau a. Ka nihna ang anga min pawm tur hi chuan ka beisei ngam lo. I rilru ka nei zo ta lo a nih paw’n i tan thian tha ka ni reng ang, nangin i rem tih chuan!
Hmangaihna nen College
College ka kal chhung zawnga i bula ka hun hman thinte kha ka hre reng a. thiante nena kan nuih ho bawk bawk te kha vanglai hun sawi ve tur kan neih te a lo ni ve ta reng mai.
Kum thum chhung ni tin inthen tawh lo tur ang maiin kan in hmu khawm a, tunah chuan kan awmna leh hnathawh te a lo danglam tawh a. Kum khat mai ni lo, kum sawm chuang te in hmuh tak loh hun a lo thleng ta reng mai!
Lunglenthlak takin College nun kan hmang zo a, nupui pasal neiin kan awm ta a. Khang hun hlimawm tak te kha ka rilruah a awm reng a. Kan thian fel tak tak te khan han hre ve reng thin tak ang maw?
Friends for ever
Tunah chuan kan fate pawh nula tlangval an lo ni ve ta a. Kan sulhnu chhuiin nun an rawn hmang chho ve ta a, kan thatlai hun min hriatchhuah tir fo thin.
Kan inthianthatna hi i bulah awm tawh lo mahila a la ngai reng a, a la danglam ngai lo. Kan khawsak leh nunphungte chu lo danglam hle tawh mah se kan upa telh telh a, thian hluite an hlu tawlh tawlh thin.
Ka rilruah sulhnu nei miah loa, sulhnu nei i liam hi ka lawm em em a, englaipawhin ka thian i ni reng ang.