Aizawl : Bangalore Mizo Association (BMA) huaihawtin Inrinni khan Bangalore-a Mizo awm ten Vangpui Kut an hmang a. Minister C. Lalrinsanga’n kut hi hmanpuiin, Dr. HT Sangliana, IPS (Rtd)/Ex-MP te nupa chu Kut nu leh pa an ni.
Minister C. Lalrinsanga chuan Kut pa HT Sangliana chu dikna duh, mi rinawm a nih thu sawiin, “a ropuina ber, dikna, taimakna leh rinawmna hi hre reng ang u” a ti a. “Rinawmna leh dikna hmachhuana hna thawka, kan nun kan hman chuan kan hlawhtlingin chhenfakawm kan ni zel thei dawn a ni” a ti.
C Lalrinsanga chuan “ram intodelhlo kan nih avangin intodelh turin theihtawp kan ch- huah a ngai a, sorkar hna in min daih vek lova, entrepreneurship lamah hian hma kan sawn zel a ngai a, mahni kea ding turin zau zawk kan thlir zel a ngai a ni” tiin, “khawi hmunah pawh awm ila Mizo hnam leh ram hmasawn theihna turin theihtawp i chhuah zel ang u” tiin Bangalore Mizote fuihna thu a sawi.
Bangalore-ah Mizo ten Mizoram House neih hlan an nghakhlelh zia hriain a hm- unhma pawh a tlawh tawh tih sawiin, Minister C Lalrinsanga chuan Mizoram House an mamawh thu chu Chief Minister hnenah pawh a thlen tawh thu leh fund neih theih dan tur pawh Chief Minister nen SASCE (Special assistance to states for capital expenditure) atanga Bangalore Mizoram house sakna tur ruahman a nih theih dan an sawidun tawh thu a sawi a. Bangalore Mizoram House sakna tur ruahman thuai a nih a beisei thu a sawi bawk.