Social Welfare Minister Dr. K. Beichhua chuan Inrinni zingkar khan Siaha khawpuia hmasawnna hnathawh mek te tlawhkualin, an harsatna te a enfiah.
Social Welfare & Tribal Affairs Department kaltlanga Siaha Vaihpi Community Hall sak mek chu tlawhin bialtu MLA Dr K Beichhua hian, hna a that leh that lohte a en bakah sak chhunzawm zel dan turte contractor-te leh department engineer te nen an sawiho nghal.
Hemi hnu hian Siaha DC Office building sak mek pawh a tlawh nghal bawk.
Dr. K Beichhua chuan Siaha Meisavaih hmuna District Social Welfare Department office building sak mek pawh a tlawh bawk a, a hna enkawltu department engineer-te hnathawh chu lungawithlak a tih thu leh chhuanawm a tih thu a sawi a, sum tlemte hmanga hna tha an thawk thei chu lawmawm a tih thu a sawi. A sak chhunzawmna atana sum mamawhte pawh Ministry of Tribal Affairs ah a rang lama bawhzui a nih tur thu a sawi.
Siaha district Taxation Department office building khawr pum tawh pawh tlawh bawkin, electric fitting hna la hmabak te pawh Siaha bialtu MLA hian a changtu Taxation Minister Lalchamliana be nghalin, building peihfel thuai a nih theih nan chak zawka hma laksak turin a ngen a ni.
Dr. K. Beichhua hi Social Welfare Department Engineer te leh Siaha district Taxation Department-a Deputy Commissioner of State Tax H Vabeitha te’n an tawiawm a ni.