Serie A champion AC Milan in huntawp dawnah inkhel boruak sang leh hmuhnawm takah hnehna an chang zawk a. 3-1 in Empoli an hneh zanah huntawp dawnah goal thum a lut.
Stadio Carlo Castellani ah Milan hian chungnung zawk nih tum ran a bul tanin an nawr na nghal viau a. Mikhual team hian first half pumah tha thlah lova an khingpuite hi nawr hle in Empoli goalkeeper Guglielmo Vicario chetthat vang chauhin goal an khung lo.
Rafael Leao-a’n huntha a hloh a, Milan in tunhnaia buaina an neih chu la kal chhunzawm zelin winger Alexis Saelemaekers leh right back Davide Calabria te first half-ah inhliam vangin lakchhuah an ngai a. Second half-ah defender tawnhriat ngah Simon Kjaer pawh lakchhuah a ngai.
Minute 79-naah Ante Rebic hmangin hma an hruai a, Leao-a’n ball tha a siamsak.
Empoli in huntawp dawn hun pek belhah Nedim Bajrami hmangin an si phurh an sut a. Point khat an hmu dawn niin a lang hman.
Mahse Milan tan Fode Ballo-Toure leh Leao ten goal an la khung belh hman a ni.
Inkhel dangah Inter Milan chu an tlawm a, San Siro-ah 2-1 in AS Roma in an hneh.
Roma tan Paulo Dybala chuan an si phurh sutin Inter tana Federico Dimarco goal khung a sut a. Chris Smalling chuan chakna goal a khung.
Napoli tan André-Frank Zambo Anguissa chuan goal hnih a khung zanah 3-1 a chakin league-ah hma an hruai ve bawk.