Aizawl: ZPM leader Lalduhoma chuan Mizoramah Congress leh MNF an insorkar chhawk chhungin kalphung an thlak lo a, an inlal chhawk satliah a, an inang reng tih a sawi.
Inrinnia Lengpuia ZPM Mamit East Block Conference hmanpuiin Lalduhoma hian thu a sawi a. Congress leh MNF party-ten sorkarna an chan chhungin an duh duh danin pawisa an hmang a, pawisain a thlenna tur a thleng si lo. Central scheme tam zet mipui tana kal chu nasa takin an hmang khaw lo niin a sawi a. “Tunah chuan central-in thupek khauh tak chhuahin system thar hmangin sum enkawl dan chu a thunun ta a, an buai ta vak a nih hi,” a ti.
Lalduhoma hian MNF kaihhruai Mizoram sorkar chu sum enkawl kawngah a hlawmchham tih sawiin, “Kum khat chhunga kan ram sum indaih lohna tur cheng vaibelchhe sang chuanga an chhut sual atang hian he sorkar hi sum enkawl kawngah a rintlak lohzia a chiang a ni. Puk tura an chhut bak hi nasa takin an puk belh a, thil danga puk theih zawng zawng an puk vek tawh hnuah overdraft-in an puk ta sek mai,” tiin, treasury khar loin an awm hram hram niin a sawi.
MNF sorkarin PMGSY contractor-te pawisa vaibelchhe 100 chuang a batsak mek tih sawiin Lalduhoma hian, an hnuaia hnathawkten hlawh an la thei lo, pawisa a vâng a, ram mipuiin an tawrh mek laiin Kamrula leh Zoramchhana te bill a tang ngai lo niin a sawi a. “Health care-ah hian an sorkar hmasak khan an hlawhchham thak a, tunah hian puk chawpin scheme an siam; mahse, October, 2020 atangin damlo inenkawlna pe thei lo a, mi tam tak mangangin an awm, mipuiin registration pawh an ti tha duh tawh lo,” tiin, Pathian leh mipui zarah ZPM an sorkar chuan health care hi cashless system-in an kalpui dawn niin a sawi.