Mizoram Public Service Commission (MPSC)-in tun hnaia combines competitive examination result a tihchhuaha a pum puia pakhatna, KC Zalena’n Mizoram Civil Services (MCS)-ah tling mah se, a tum ber chu All India Services-a inziah tlin a nih thu leh theihtawp chhuah zel a tum thu a sawi.
MPSC-in combines competitive examination result a tihchhuah takah hian MCS-ah mi 14, Mizoram Police Services (MPS)-ah mi pariat, Mizoram Finance & Accounts Services (MF&AS)-ah mi pariat leh Mizoram Information Service (MIS)-ah mi pali an tling a; KC Zalena hi a pum puia pakhatna a ni.
The Zozam Times-in a kawmnaah KC Zalena chuan a tum ber chu All India Services-a inziahtlin a nih thu chu sawiin, UPSC-in preliminary exam a buatsaih-ah tum nga exam a bei tawh a, tum li chu prelims-ah inziak tling lovin, a tum ngana, kuminah prelims paltlangin, mains exam result a nghak mek a, a tling zo lo a nih pawhin kum hnih emaw, kum thum vel chu UPSC exam hmachhawn leh a la tum thu a sawi.
“Tunah MCS-ah inziak tling mah ila, central services lama lut tura la beih chu ka tum zel a; mahse, hnathawh pah a ngai tawh dawn a, inpek zual chu a ngai ang,” a ti.
Kum 29 mi, Siaha district-a Chhaolo III khua piang leh sei lian, tuna Aizawl Zonuam venga mi in luaha khawsa mek, Zalena hi lehkha thiam thei tak nia sawi a ni a. A chanchin amahin a sawi danin high school leh higher secondary school chu Home Missions, School, Aizawl-ah kalin, HSLC-ah Mizoramah 8-na a ni a, HSSLC-ah Science stream-ah 6-na a ni bawk.
High school a kal lai chuan engineer niha ram pawna company liana thawh pawh a lo tum tawh thin tih amah kawmtu The Zozam Times a hrilh a, B.Tech a zawh hnuah erawh a u-ten an buaipui competitive exam lamah a rilru a pe lian ta niin a sawi.
A lehkha zir dan sawiin, Zalena chuan, “B.Tech ka zawh hnu khan ka theih ang angin competitive exam turin kan inbuatsaih a, hmanruate la khawmin coaching class erawh ka kal lova, ni khatah darkar sarih vel chu inzir ziah ang ka ni,” a ti.
Exam dawnah chuan ni dang ai chuan zir tam deuh mah se, a dawn hnaia inzir vak thin a nih loh thu a sawi a. A pawimawh ber nia a ngaih chu chhum lo chat lova inzir char char a nih thu a sawi.
Zalena chuan hlawhtlinna a chan chhan chu Pathian malsawmna a nih thu leh a nu leh pain zirna an ngaih pawimawh em vang a nih thu a sawi a. UPSC leh MPSC-in examination an buatsaih a hmachhawn tur atan Chhaolo mipuiten an tawngtaipui thin nia sawiin, UPSC-a prelims-a a inziah tlinin MADC sorkar, MYC leh Synod atangin a inbuatsaih zelna tur senso tur sum a dawn thu leh lawmawm a tih thu a sawi bawk.
The Zozam Times-in a kawm lai hian Zalena bulah a pa, KC Lalduhsanga’n tawiawmin, a fate chu high school an kal chinah lehkha zira hmun danga an awm thu leh a bula an awm lai chuan a hna haw hnuah khawlai chhuak tawh lova a fate chu lehkha a zitir thin thu a sawi.
Zalena pa, KC Lalduhsanga hi North Vanlaiphai Govt Middle School-a headmaster ni lai a ni.