French champion tan Lionel Messi chuan a ball pet thiam lantirin freekick mawi a khung a. Star player Kylian Mbappe chuan chakna goal khung bawkin 2-1 in Nice an hneh.
Inrinni zana Parc des Princes a inkhelah Messi-a’n minute 28-naah freekick mawi a pet lut a. Tun season-ah inelna hrang hranga PSG tan goal sarih a khungna a ni a. Ram tan tunhnaia game hnihah goal li khung bawkin Messi a chetha leh mek hle.
Mahse PSG coach Christophe Galtier-a team hlui Nice in an chhanglet thei a. Second half tan hnu lawkah Gaetan Laborde chuan goal a khung.
A tawpah erawh PSG bawk an dingchang a. French forward Mbappe chu substitute bench-ah dah niin chawlh hahdam tir a ni a, second half a luhtir a nih hnuah Nordi Mukiele siamsak atangin an chakna goal a khung a. Paris St-Germain hian point hnihin league-ah hma an hruai leh mek.