Aizawl: Minister of State Lalruatkima’n ‘tar ât’ tih tawngkam bo daih tawh se a duh thu a sawi a. “Kan upa tawlh tawlh a, kan hriatna a pung tawlh tawlh a, kan fing tawlh tawlh a ni,” a ti.
Kanan Veng Branch MUP te Upate Ni a hmanpuinaah he thu hi Inrinni khan Lalruatkima chuan a sawi a. “Hnam changkang leh ropui apiangin upate an ngai pawimawh a, upate zah leh duat kawngah Mizote hian zir tur kan la ngah hlein ka hria,” a ti.
Lalruatkima chuan, “Mihring hian tawnhriat kan ngah tulh tulh a, kan fing tulh tulh a, kum upate tawnhriat chhawr tangkai thiam leh zual turin ngaihtuahna kan hman a ngai,” a ti a. Kum upate pawh khawvel hmasawn chak tak lo dawngsawng thiam tura an inbuasaih ve erawh a tul thu a sawi.
Upate pawimawhzia sawiin, Lalruatkima chuan, “Mahni in chhung theuha chhungkaw hotu ber, thalaite finchhuaha kaihruaitu, ram leh hnam tana mi tangkai an ni,” a ti a. “Kan tu leh fate thlenga upate hlutna kan inzirtir a pawimawh,” a ti.
Lalruatkima chuan Zawlbuk a bo hnuah YMA, MUP, MHIP ten chhiat/thatah mawhphurhna lain ram leh hnam kal zelna atana mi tangkai, sorkar thurawn petu Valupa dinhmunah an ding ta tih sawiin, hetianga pawl chak tak ni mah se, mi chunga len emaw, mi chungtlak emaw chu an tih tur a ni lo tih hre thar turin upa pawl member kalkhawmte chu a chah bawk.