Inrinni chawhnu dar 2 khan MJA Aizawl Press Club, Treasury Square-ah Julie L Ralte ziak ‘Thuruk & Thuhruk’ lehkhabu chu F. Vanlalrochana’n (Roa Fanai) a tlangzarh.
Fiction leh non-fiction thuziak thu tawi (short strory) 20 awmna Rs. 250 man ‘Thuruk & Thuhruk’ hi Synod Bookroom hrang hrang, lehkhabu dawr hrang hrang leh Instagram online lamah Lehkhabuk bakah FIT Lehkhabu lamah ngaihven theih a ni.
Tlangzarhtu F. Vanlalrochana chuan tlangzarh inkhawmah hian Mizoramah lehkhabu ziaktute chu hnam ro hlu tak ni mah se, chawi belhin an kal thin tih sawiin, “A ziaktu an hlawk lo bera Mizoram leh hnam tana an mahni sensoa lehkhabu an tichhuak thin hi an chhuanawm ka ti a ni,” a ti a. “Lehkhabu hi hnam nun chelhtu a ni, khawvela hnam ropui leh hlun hi lehkhabu nei tha a ni. Hlawk loha lehkhabu ziaktute hian kan hnamah beiseina an nei a ni a, a ropui ka ti em em a ni,” a ti a. Tun hnaiah lehkhabu chhiar kan uar thar leh ta chu lawmawm a tih thu a sawi.
Lehkhabu tlangzarh inkhawm hi Lalnuntawma Fanai-in a kaihruai a, Lalpianfela Chawngthu-in a thlir lawk a, Dr. Zoramdinthara, Secretary, MAL leh Lalhruaitluanga Chawngte ten thu tawi an sawi.