Aizawl, Zonuam Branch MHIP-in Inrinni khan an veng mi hmeichhe naupang pawngsual ni ngeia rinhlelh boral ta thlavang hauh nan leh pawikhawihtu man chhuah thuai phutin an veng chhungah kawngzawh an huaihawt a. Zonuam veng mipuiin an duh ber chu naupang rawng taka pawngsualtu man chhuah a nih thu an aupui.
Kawngzawhtute hian Zonuam kawn atanga bultanin an veng chhung hmun lun laiah MHIP hruaitu, YMA leh local council hruaitu ten thu an sawi a. MHIP hruaitute chuan naute boral ta chu pawngsual ngei nia ngaih a nih thu sawiin, mahni pawh la insaseng thei lo naute chunga hursualna avanga tisa châkna hrikthlakna a awm ngeia lang chu rapthlak leh zahthlak an tih thu an sawi.
Zonuam Local Council Chairman J Lalhmahruaia pawhin Zonuam mipuiin duh thuhmun pakhat an neih chu naupang rawng taka pawngsualtu man chhuah a nih thu sawiin, Mizoram police chhuanawm tak takten he thubuai an chhuina kawnga an hmalakna tithuanawp zawnga police kut phuarsak lo turin sorkar thuneitute an ngen tih a sawi.
Pawngsual duh loha kawng zawhtute hian resolution pass-in naupang khawngaihthlak tak pawngsualtu chu a rang thei ang bera man chhuaha a phu tawk hremna pek an phut tlat tih an tar lang.
Kawngzawhnaah hian Zonuam veng chhung bakah hmeichhe naupang lainattu thahnem tak an tel a, thuziak hrang hrang – ‘Naute pawngsualtu hi a rang lama man chhuah ngei ni rawh se’ tih te, ‘Naupang pawisawi lo chunga hleilenna a thleng hi kan duh lova, a tawp thlenga do zel kan tum’ tih te, ‘Fate dikna hai lan hi nu leh pate mawhphurhna a ni’ tih leh ‘Dikna lal rawh se,’ tih te an keng bawk.