Aizawl : Car (Chevrolet Beat) MZ-05 A 6332 a Champhai aṭanga amaha Aizawl lam pan Lalremliana (38) New Diakkawn, Kolasib chu a biak pawh theih a nih loh avanga a chanchin ngaihven a nih hnuah nimin khan Keifang leh Tuirini inkar kawngthlangah a car nen thi-a hmuh a ni.
Lalremliana hi Zirtawpni kalta khan a thian te thlahin Champhai-ah a kal a. A tuk Inrinni tlai lamah haw tura chhuakin, Ruallung-a a thian te tlawh ha- win, a tuk Pathianni tukthuan eikhamah Ruallung atangin a chhuak leh a. a chhungte pawh phone-in a bia a, a hnu lamah biak pawh theih a nih tak loh avangin Pathianni zan atangin an zawng a, nimin zing dar 6 velah Keifang leh Tuirini inkar kawngthlangah hmuh a ni ta niin thudawnna chuan a sawi.
Car hi metre 150 vel lumin, a chhe nasa hle a, A neitu leh a khalhtu Lalremliana ruang chu Saitual Police leh Ruallung leh Keifanga mitlawmngai ten la chhuakin, nimin vek khan Saitual damdawi in-a post mortem a nih hnuah an khua Kolasib lam panpui a nih thu thudawnna chuan a sawi a. A nupui leh fapa pahnih a kalsan niin a sawi bawk.