China-in Tianhe module an thlawh chhuahtirna thlalak leh India rama tun hnaia ruang an halna ni awm tak dah dunin, “China mei hal dan leh India mei hal dan inan lohna,” tiin deu ni awm takin an social media-a a tar lan chu a hnu lawkah a paih (delete) leh.
China rama an social media lian, Sina Weibo-a thlalak hi sawiseltu an tam hle hnuah an delete leh.
Inrinnia thlalak an tar lanah hian Communist Party Central Political & Legal Affairs Commission chuan hashtag hmangin India ramah mi nuai li chuangin ni khata Covid-19 kai thar an nei tih an dah tel bawk.
Hemi chungchang zawhna awmte chu China foreign ministry chuan, “Hei hian India ramin hripui a dona kawngah China sorkar leh mipui nawlpuiten kan thlawpzia a lantir,” tiin an chhang.
Foreign ministry chuan tun atanga ni reilo teah India tanpuina tur tam zawk pek chhuah chhunzawm zel a nih tur thu an puang nghal.
India leh China inkungkaihna hi nikuma ramri buaina chhuaka sipai eng emaw zatin nunna an chân hnu atang khan ziaawm lam a pan hleithei lo a. China ramin tun hnaiah India tanpui tura a inpeih thu a puan pawh India-in a la ngawihbosan rih.