Siaha-a district level ruihhlo do committee-in local level leh village level ruihhlo do committee din an rem ti a, local level leh village level committee hruiatu tur te chu district level committee hian a ruat ang.
Nimina Siaha-a district level ruihhlo do committee thutkhawm hi Excise Minister Dr K. Beichhua pawhin a telpui a. Ruihhlo chi hrang hrangin na tak- in Mizoram a run mek thu sawiin, “Sum indaihloh thu leh manpower indaihlohna sawi hman a nih loh thu leh indaih hun nghah hman a nih loh thu a sawi a. Theitawp chhuaha Excise Force leh Police te nen tlawmngai pawl leh kohhran hrang hrangte, VC leh chanchinbumite tang hova ruihhlo do beihpui thlak a tul thu a sawi.
Tlawmngai pawl leh kohhran hrang hrang ten ruihhlo do kawnga sorkar an thlawp tlat thin thu leh lawmawm a tih thu Excise Minister chuan sawiin, mipui thlawpna lo chuan sorkar chakna chauh chuan ruihhlo chu do hneh chi a nih loh thu a sawi a. District level ruihhlo do committee te hmalaknaa a tula hman tur Rs. nuai 300 dil mek a nih thu a sawi bawk.
Siaha district level ruihhlo do committee-ah hian Siaha Bawrhsap chu chairman niin, MTP (H) President chu member secretary a ni a, Siaha SP Convener a ni thung. Committee member-ah sorkar pisa hrang hranga hotute,, MJA president, NGO hrang hrang President, kohhran hrang hrang aiawh leh Joint VC aiawh te an awm bawk a ni.