Ramri lamah Assam an che hmasa leh ta tlat mai!
Assam leh Mizoramin ramri buaina avanga harsatna kan neih hnuah inbiak remna zawngin state pahnih hotu lawkte an inhmu chamchi a, inremna a awm mai dawn nia a lan chhoh lai leh sorkar laipui lam hriatpui thlapa ramri hnaihah kutthlak phal loh a nih laiin tun hnai khan Assam lam chuan Bairabi hnaih lamah chawlhbuk an rawn sa a, en liam mai mai chi niin a lang ta lo.
Hemi thu an hriat veleh MZP lam chu an president hoin an kal nghal a, a tul anga hmalakna nei tur leh an thiah ngei theih nan hma an la nghal bawk. MZP tan ngat phei hi chuan en liam mai mai chi niin a lang lo a, tuna Assam lamin kut an rawn thlakna hmun hi Zofate Chawlhbuk an lo sak tawhna hmun bul lawk, inkahna thlen phah hialna kha a nih avangin a thanatthlak zual hle ang tih a rinawm.
An thuchhuahah pawh a tul anga hmalak an tum thu sawi nghalin, an khawmpui lian Assembly tun thla tawpa an neih tur leh Zofest, 2022 pawh neih loh phah hial khawpa hmalak nghal an tum thu an sawi a, zirlaite mai bakah ram leh hnam tana MZP lo hmalak tawhna leh ke pen chin zel hi kan hnam tan hian ropui leh hlu tak a ni.
Hetiang hi kan dinhmun a nih leh dawn tak siah chuan sorkar pawh hian rawtna leh ngaihdan fumfe tak nei chungin a tul angin hma la nghal thuai thuai se la, buaina nasa zawk a chhuah leh hma ngeiin chet lakna lo nei hmasa mawlh teh se.