Aizawl : PC party-in MNF sorkarna hnuaiah Assam an huangtau niin an sawi a. Assam lamin state pahnihin kutthlak lo tura tihna hmun Bairabi Zophaia in an sa leh chu an duh loh thu an sawi.
Ramri chungchanga Mizoram leh Assam sorkar inbiakna a kal mek laia Mizoram chhunga Assam lam an huangtau viau chhan chu Deputy Chief Minister Tawnluia chairman-na hnuaia Boundary committee-in Assam mitmei veng chunga hma a lak vang nia an ngaih tuh PC party chuan an sawi a. Boundary committee-in Mizoram tana hamthatna aia Assam sorkar rilrem zawnga ke a pen zawk nia an hriat avangin PC party chuan Boundary committee chu tel zuina tlaka ngai lovin September khan an lo inhnukdawk tawh tih an sawi.
PC party chuan “Kan ram leh hnam hmakhawngaia MZP ten engkim huama Mizoram humhim nana hma an la leh hi PC party chuan fakawm kan tiin kan chhuang takzet a, kan thlawp tlat a ni” an ti a. “Ramri humhalh kawngah social media aṭanga mipuiin chanchin an hriat hnu pawha Mizoram sorkar a che mai thin lo hi pawi kan tiin sorkar ṭuanrang leh huaisen kan mamawh tih a langah kan ngai” an ti.
Tun thlaa Mizoram leh Assam sorkar aiawh Guwahati-a an inbiak leh na turah pawh mipui nawlpui duh dana huaisen ngam ve tawh turin Mizoram sorkar chu an phut tih PC party chuan an sawi bawk.