Aizawl: State AIDS Control Society (MSACS) leh Association for Voluntary Blood Donation (AVBD) huaihawtin Thawhtanni khan Chanmari YMA Hall, Aizawlah National Voluntary Blood Donation Day hman a ni.
National Voluntary Blood Donation Day hmannaah hian MSACS Project Director Dr Lalthlengliani chuan, thisen pek a hlu tih sawiin, “Thisen pek a hlu a, thisen pe thei nih a hlu a, thisen pe thei tura tan lak a pawimawh a, kan nunphungah invawn a tul,” a ti.
Dr Lalthlengliani chuan sorkar kum kal mekah Mizoram pumah thisen unit 15,244 pek a ni tawh tih sawiin, “Chung zinga unit 14,176 chu a thlawna pek a ni a, voluntary donation percentage chu 93% a ni,” a ti a; kum kal mekah blood donation camp tum 252 huaihawt a nih tawh thu leh chutah chuan thisen unit 10,012 pek a nih tawh thu a sawi.
HIV/AIDS chungchang sawiin MSACS project director chuan, “HIV-ah Mizoram dinhmun a tha lo. HIV hrik darh danah Mizoram hi India ramah a sang filawr a, kai thar an la awm zel a, a la darh zel tihna a ni. HIV kai thar titlem sorkar laipuiin a ngai pawimawh a, chuta tan chuan mi tin kan pawimawh a ni,” a ti.
NVBDD hmannaah hian Dr Sangzuala, Assistant Professor, ZMC-in thisen pe tura nunphung hrisel chungchang a sawi a, MSACS Joint Director (IEC) Lalzuiliani’n HIV laka inven nan mipat hmeichhiatna lama fimkhur a tul dante a sawi.
MSACS-a Epidemiologist Dr CLR Hluna’n HIV/AIDS chungchang a sawifiah a, C Lalbiakthanga, Dinthar Vengin ruihhlo tih loh a pawimawhzia a sawi bawk.
MSACS Assistant Director (YA) Lalneihzeli kaihhruaiin quiz buatsaih a ni a, AVBD General Secretary Lalrinkima’n lawmthu sawina hun hmangin hnu a khar a ni.
National Voluntary Blood Donation Day hi October 1 a ni a, kuminah chuan Inrinni a nih avangin October 3, Thawhtanniah hman niin, thupui chu ‘Donating blood is an act of solidarity. Join the effort and save lives’ tih a ni.
Nimina NVBDD hmannaah hian Mizoram Institute of Comprehensive Education (MICE), Mount Carmel School leh Greenland Higher Secondary School zirlaite an tel a ni.