- Mahmuaka Chhakchhuak
Vawiin hi Thawhtanni a ni, niminah khan zoram hmun hrang hrangah Kohhran thenkhatte chuan Naupang khawmpui an neiin intihsiakna ngaihnawm tak tak ngaihthlak leh hmuh a ni. Social media lamah video hmuhnawm tak tak leh a thente chu min ti hlimtu tak takte pawh a awm bawk a, kan thlir dan erawh a in ang vek kher lo mai thei e. Kei erawh chuan heng thlalak leh video clip ka hmuhte hian kumtinin ka rilru a na thar leh thin a, midangin intihsiakna hmuna naupang tu emaw che maksak deuh, ti mai ang, han che danglam deuhte an nuih a, za taka an nuih lai hian keichuan kum tam tak liam tawha Naupang intihsiakna hmuna zak taka ka awm lai kha ka hrechhuak lo thei lo a, kha thil avang khan vawiin thleng hian nuih har ka ti a, ka zak ru leh ngawih ngawih thin.
Kum sawm vel ka ni mai thei e, Khawzawl Bial Sunday School khawmpui hi Chawngtlaiah nghah a ni a, a hma daih atang tawhin keini chu intihsiaknaa kan tel dawn avangin kan lo zir ngawrh hle thin a. Thu inchhangte, Hlate, Bible chang sawite leh Recitation-te chu hneh taka sawi a sa thei turin kan zir ngawrh viau thin. Tichuan, khawmpui kal a rawn hun dawn a, keini pawh kan phur hle a, kan kal dawn zanah phei chuan kan helhhawlh a ni ber mai. Kan thiante pahnih phei chuan Chawngtlaiah chhungte an neih avangin Zirtawpniah an lo va kal hmasa lehnghal a. Keini chu Kawnzar veng atangin khawmpui kan neihna hmun tur Chawngtlaiah chuan kein kan kal a, kan inzui dam dam a, a nuam kan ti hle mai. Kan chawlhni thawmhnawte chu bag-ah akin ute rualin kan kal ve hnak hnak a, kawngkama tui ina kan chawlh laite pawh vawiin thleng hian ka mitthlaah fiah takin ka la hmu thin. Ni a sa tha bawk a, bianga thlantui luang zawih zawihin tlai lam dar 4 velah hian Chawngtlai chu kan lut a, kan thiante pahnih (an hming chu sawi ta lo mai ila) chuan min lo hmuak a, nizana TV an en thute chu hlim takin min hrilh mawlh mawlh bawk a, Biak Ina mikhual min lo hmuah avangin kan zavai chuan kan lut a, chumi hnuah kan thlenna turah min sem darh leh a.
Inrinni zanah chuan tlaia min lo hmuahna hmun Biak Inah chuan kan inkhawm a, hmun hrang hrang atanga Naupang khawmpui rawn kalte chu thutna hran theuhah min thut tirin inkhawm tan hnuah Chairman chuan inhmelhriat nan min din tir hlawm a, keini ngei pawh chu a rualin kan ding thap a, Kawnzar veng atanga kal hi mi 30 vel kan ni awm e. Inrinni zan atang hian intihsiakna neih a ni a, hemi zanah hi chuan Senior leh Intermediate Department bik chauhin intihsiakna hi an nei ta niin ka hria. A tuk, Pathianni zing atang chuan keini, Junior Department leh a hnuai lamte chuan intihsiakna kan nei ve leh a, hetah chiah hian a ni vawiin thlenga ka rilru tina tu ka tawn a, vawiin thlenga Naupang intihsiakna alo thlen apianga ka zah ruk ngawih ngawihna chhan alo thleng chu. Chu chu hetiang hi a ni a; Keini Junior mipate chu panga kan ni a, tlar hma berah kan thu a, Chairman sir dinglamah hian a ni nghe nghe. Lamtual sir mai a nih bawk avang chuan kan langsar viau bawk a. Chutianga intihsiakna kan han neih dawnah chuan kan zirtirtu pakhat hi a rawn kalin ka beng bulah a rawn kun hniam a ‘Intihsiakna hunah chuan lo tel ve lo mai la, midang din laiin lo thu ang che’ tiin min rawn hrilh a, tichuan ka thiante din lai chuan ngawi rengin ka lo thu a, engmah pawh ka sawi ve ta lo a ni.
Hei hi a chhan min hrilh lem lo a, thuawih tak chuan ka thu mai a. Naupang ta na na na chu lungawih lohah pawh la chuang loin khawmpui pawh hlim takin ka hmang tho a, nimahsela khami darkar erawh kha chuan ka zak hle mai a, mak pawh ka ti a, zirtirtute thu erawh tha taka zawmin ka thu ta hle hle mai a ni. Vawiin thleng hian khatia min thut tira intihsiaknaa min tel tir leh tak lohna chhan kha kan zirtirtu (amah pawh ka la hre chiang em em) khan min la hrilh chuang lo a, keimah pawh chuan zawh pawh ka la zawt bik ta chuang lo. Naupan lai hian ka tawng fiah lo thin a, miin fiah taka thil an lam rik tam tak hi kei chuan fiah takin ka lam ri ve ngai lo a, chutianga ka tawng fiah vak loh avang chuan min tel tir ta loin min thut tir em ni ni ang tih chu tun hnua kan rindan a ni. A dik mai thei a, a dik lo thei bawk. A engapawhchu nisela, kha thil thleng kha vawiin thlenga Naupang inkhawmpui neih apianga ka hriatchhuah thar leh ziah chu a ni tlat thung si a, ka zak thar leh a, ka inthlahrung thar leh ziah thin.
Cell Phone atanga Naupang inkhawmpui lai thlalak leh video chi hrang hrang ka han thlir a, keimah ang bawka tawng fiah lo chunga thu inchhang sawi lai ka hmuhte hian ka mit an la bik a, an vannei bikin ka hre thin. Kei chu tawng fiah loh avanga thu inchhang sawi lo tura thut tir kha niin ka inhre tlat si a, kum rei tak chhung kha ka tawng fiah loh avanga nuihzat pawh hlawh ka ni. Amaherawhchu ka chhungte, ka nu leh pa leh ka unaute erawh chuan tawng fiah lo kan nih an hre reng chungin min nuihzat ve ngai miah lo a, thil ka lam fiah loh pawhin an nui ve ngai hauh lo. Chu chuan keimahah mi pangngai phak vea inngaihna min neih tir a, Primary School kan kal laite Middle School kan kal te leh High School kan kal laite ngei pawh chuan mi theih ang chu theih ve ngei ka tum thin. Zirna kawngah a ni emaw thil dangah pawh a hnufual pawlah ka tang ngai bik lo.
Tun hnua ka ngaihtuah let leh hian kan chhungkaw inenkawl dan kha a tha ber e chu ka ti hauh lo nain pawnlam boruakah ngei pawh chhungkaw inenkawlna tha leh tha lo chu alo hriat bik thin a, ka pa hian dawt sawi a phal ngai lo te kha kan kum alo tam ve deuh tak hnuah hian a that zia ka hrechhuak nawn fo thin a ni. Naupang Sunday School atanga Puitling Sunday School-a min hlankai nia ka tlanbote kha tun hnuah hian ka nu leh pa lo zah tur zia ka ngaihtuah thin a, nimahsela khami Pathianni tlaia chhung Inkhawmnaah ka pain min zawh chuan ‘Phaiah tui ka cheng’ tia sawiin dawt ka sawi ngam chuang hauh lo. Chuvang chuan kan naupan laia ka pain chhung inkhawmnaa min fuih fona leh thu tha tinrenga min inenkawlna chuan kan puitlin hnu pawhin awmzia alo neih zia hi ka hria a, kum sawm thum hnuah hian alo that zia ka hrechhuak nawn fo thin a ni.
Chuvang chuan alawm, Naupang Sunday School inkhawmpuinaa intihsiakna hmuna min tel tir leh loh tak avanga ka zah ruk em emna pawh chuan vawiin thlengin ka thinlungah hmun chang mahsela chu ka zah rukna vek chuan tumruhna min siam thin a, rual pawl loa min ngaihna (nia ka hriat) chuan rual khum duhna thinlung min neih tir phah zawk a, rual khum tumin keimah leh keimah ka infuih fo bawk thin.