- Ruata
Nikum khan Covid hripui leng avang leh semi conductor chip indaihlohna avangin lirthei hralh a tlahniam nasa hle a. Tunah hian market lam chuan ngai rawn awh chho lehin September thlaa passenger car siamtu company hrang hrangten an lirthei an hralhchhuah dan an tichhuak leh ta a, kan thlir ho dawn a ni.
Lirthei siamtu thenkhat Maruti Suzuki, Hyundai, Tata Motors, Mahindra leh Kia September 2022 chhung lirthei hralhchhuah lamah hma an sawn nasa viau a. Company hrang hrang dinhmun han en ho ila.
MARUTI SUZUKI – 135% SALES PUNNA
Maruti Suzuki hian lirthei 1,76,306 (Domestic PV + OEM Supply + Export) lai mai September 2022 chhung hian an hralhchhuak a, nikum September thlaah khan lirthei 86,380 an hralhchhuak a ni. An hralhchhuah zat punna hi zaa 135 lai mai a ni a Company hian an OEM partner teah lirthei 4,018 an pechhuak a, rampawna an thawnchhuah zat hi lirthei 21,403 a ni.
Thla hmasa chhung khan Maruti Suzuki hian Alto leh SPresso 29,574 hralhin compact segment lamah Baleno, Celerio, Dzire, Ignis, Swift, Tour S leh Wagon R 72,156 a hralh a. Ciaz car 1,359 an hralhchhuak bawk a ni. Utility vehicle segment (Brezza, Ertiga, S-Cross, XL6 leh Grand Vitara) ho hi 32,574 hralhchhuah niin Eeco van hi 12,697 an hralhchhuak bawk a ni.
HYUNDAI – 50% SALES PUNNA
Hyundai Motor India hian thla hmasa khan lirthei 63,201 hralhin nikum September thla khan lirthei 45,791 an hralhchhuak a.Ramchhungah Hyundai Motor India hian lirthei 49,700 nikum khan lirthei 33,087 an hralh a, a punna hi zaa 50.2 a ni.Thla hmasa khan Hyundai hian lirthei 13,501 chu rampawnah an thawnchhuak bawk a ni.
TATA MOTORS – 85% SALES PUNNA
Tata Motors pawh an che tha viau mai a. Lirthei 47,654 September 2022 ah an hralh a, nikum khan 25,730 an hralh thung a ni. Zaa 85 in an lirthei hralh zat hi nikum nena khaikhinin a pung a ni. Internal combustion engine (petrol leh diesel) hmang lirthei 43,999 an hralhchhuak a, Nikum kha chuan ICE lirthei hi 24,652 an hralhchhuak thung a ni. Tata hian electric hmang lirthei 3,655 lai mai thla hmasa khan an hralhchhuak a, nikum September thlaah kha chuan 1,078 an hralhchhuak thung a ni. Electric vehicle lama an lirthei hralhzat punna hi zaa 239 lai a ni.
MAHINDRA – 163% SALES PUNNA
Mahindra hian thla khat chhunga lirthei an hralh hnem ber tum an thleng a. Nikum September thlaa lirthei 12,863 an hralh kha kuminah chuan 34,508 lai an hralhchhuak a. A punna hi 163% lai a ni. Mahindra hian Scorpio an pechhuak tan tawh a, lirthei thar XUV400 EV, XUV300 facelift, Thar 5-door leh Bolero Neo Plus te tichhuak turin ruahmanna an siam chho mek bawk a ni.
KIA – 79.1% SALES PUNNA
Mizoramah pawh dealership tha tak mai rawn awm thar, Kia India hian thla hmasa khan lirthei 25,857 an hralhchhuak a, nikum September thla kha chuan lirthei 14,441 an hralhchhuak thung a ni. An lirthei hralh zat punna hi zaa 79.1 a ni a, an ni pawh hian nasa takin hma an sawn zel a ni. Kia hian thla hmasa chhung khan Seltos 11,000, Sonet 9291, Carens 5233 leh Carnival 333 an hralhchhuak a ni.
TOYOTA – 66% SALES PUNNA
Lirthei tha leh lar Innova leh Fortuner te siamtu TKM (Toyota Kirloskar Motor) company hian hla hmasa khan lirthei 15,378 an hralh thung a, zaa 66 in nikum aiin lirthei an hralh tam zawk a ni.
HONDA – 29% SALES PUNNA
Japanese company Honda chuan thla hmasa chhung khan lirthei 8,714 an hralhchhuak a, nikum September thla khan lirthei 6,765 an hralhchhuak a, an hralhchhuah zat punna hi zaa 29 a ni thung a. A tlemin a lang na a, an ni pawh hma an sawn viau tho a ni.