Motorsport-ah chuan ‘street circuit’ leh khawcheng a intawn fuh tumin inelna boruak a danglam a. A inelte tan tihsual leh chetsual palh a tam lehzual thin. F1 calendar a tlankawng hautak ber pawl, Singapore a Marina Bay khawchhung kawng a intlansiakah Red Bull car khalhtu Sergio Perez-a’n pakhatna a hauh.
Mexican driver hian Marina Bay Street Circuit-ah hnehna a chang a ni satliah lo. Ruahsur avanga kawng nal takah, bang nena inhlat lo thin tak tlankawngah tihsual nei miah lovin Formula 1 a a tel tawh hnua a la tlan that ber tum a chhal ngam niin kum 32 mi hi a vawi li nan pakhatna a ni.
Ferrari car khalhtu Charles Leclerc chu intlansiak chhung zawng dang tluanin Monagasque driver hi pahnihna a ni a. A teammate Carlos Sainz chu pathumna a ni ve thung.
Intlansiak chu
Ruah a sur nasat em avangin darkar khat leh minute 5 in intlansiak an tlai. Formula 1 intlansiak hi darkar hnih aia rei a ni thiang lo. Hei vang hian lap 61 tlan tura an tih pawh tlan zo thei lovin an tlan tan atangin darkar hnih chhung hunbi an tuk.
A hmasa pahnih intlansiakna a langsar em em lo. Pakhatna atanga tlan chhuak Leclerc aiin pahnihna atanga tlan Perez-a’n bul a tan tha. An tlanchhuah chiah a gear an thlakin Leclerc-a car ke a inphiat. Hei hi Perez-a’n hma a hruai theih phah.
Car dangte chetsual avangin intlansiak khaihlak thin leh mahse an pahnihin an tlanchak fal a, dinhmun derthawngah an ding hman lo.
Singapore kawtthler a tlankawng a chep si a, inlehpelh a har thin. Hei vang hian Leclerc-a tana remchang awm tlemte zing ami tur chu car ke an thlak hun leh kawng a ro hun a tyre pangngai an hman theih hun a ni.
Ferrari in pitstop an siam hmasak zawkah kawng a nal lutuk avangin an che rang thei lo. Hei hi Perez chhandamtu hmasa zawk a ni. Intlansiak zahve an tlan hnu lamah kawng a ro a, car ke pangngai an hman hnuah Leclerc-a’n DRS nen Perez a um. A pha mai dawn niin a lang.
Mahse Perez-a’n inpelh tir lovin a dang tluan hram thei. Lap 48 hnuah erawh Red Bull car aia tyre hmang na zawk thin Ferrari in a um reng thei tawh lo. A tawp thlengin Mexican driver a tan tluan theih phah.
Safety car tlanlaiin Perez-a’n a hnaih lutuk avangin second 5 hremna a dawng a, mahse hremna nen pawh hnehna a la chang pha tho.
An hnung lamah thil thleng a tam hle. Vawi sarih world champion ni tawh Lewis Hamilton chuan Carlos Sainz a pel hlawhtlin theih loh hnuah tihsual neiin bang a su a, pakuana a nih phah.
Champion a la hnai tho
Dutch world champion Max Verstappen-a tan intlansiak duhawm lo tak a ni. Qualifying-ah a car tuialhthei a zawh a hlauhawm avangin pariatna atang bul a tan. Intlansiak tanin a che fuh lo, 12-naah a tla thla zui bawk.
Car tha ber neitu hian a dinhmun siamtha mahse tihsual a nei nawn leh. A brake nat lutuk avangin a car ke a in ‘lock up’ a, pit stop siam nawn ngaiin a hnung berah a tla thla.
A tawpah erawh pasarihna la ni pha thovin point 6 hlu tak a hmuh belh.
Tun kartawp a Japanese Grand Prix-ah a elpui Leclerc aia point 8 a point a hmuh tam zawk a, a teammate Perez aia point 10 a hmuh tam zawk chuan world champion a ni chiang tawh dawn.