Aizawl: Thawhtanni apianga Pathian hnena inhlan tharna hun an hman chu nimin khan Congress party chuan neih chhunzawmin, thu sawi tura an sawm, Upa LH Rohmingliana, Speaker, Evangelistic Team-in ‘Ram chu Lalpa ta a ni’ tih thupui hmangin thu a sawi.
Congress Bhavan-a hun hmanah Upa LH Rohmingthanga chuan Israel rama rorelna a dik lohin ram a dam loa, sakhuana kohhran pawh a na a, ram pum pui a na. Roreltute pawhin mi rethei lu chunga vaivut thlengin an it tiin, “Khatiang dinhmun kha kan hlat lo, kan ram hi a dam lo tak zet a ni. Nimahsela, kan ram natna tidam turin Pathianin kan nei. Kan ram damna atana a damdawi chu sual sim a ni. Thil tha lo leh dik lo bansan a, thil tha ti tura hma lam kan pan a ngai,” a ti.
Upa LH Rohmingthanga chuan, “Tunah Mizoramah party pathumin tan in la em em a. Pathianin tute nge rorelna a pek leh dawn kan hre lo. Mahse, he ram rorelnaah hian ram tana inthawhnaah hian a laipuiah Lalpa tang tlat rawh se, chumi a nih chuan a chhiat mai mai theih loh,” tia sawiin, Lalpa lamah an tan phawt chuan that loh theih lohna bawm siamtirin hlawhtlin loh theih lohna bawm an siam dawn niin a sawi.
Mi mal hamthat buaipui loa Lalpa lamah tan tlat chu ram damna tur a ni tih a sawi a. “Lalpa lama tang tlat mi pakhat chauh pawhin thil nasa tak a ni thei. Chu chuan hnam leh sakhua nasa takin a ti danglam thei a ni,” tiin Upa LH Rohmingliana hian a ti bawk.
Pathian hnena inhlan tharna inkhawm hi Lalrindika Ralte, MLA-in a kaihruai a ni.