Premier League club Wolverhampton Wanderers chuan an manager Bruno Lage chu Inrinni zana West Ham United laka an tlawm hnuah an ban.
Thla 16 club enkawl hman Lage hian nikum nipui khan Nuno Espirito Santo thlakin hna a thawk tan a, a season hmasa berah Wolves hi 10-na a nihpui.
Mahse tunhnaia Premier League match 15 an khelhah vawi khat chauh chak an nei a, vawi 9 an tlawm bawk avangin Portuguese coach hi an ban.
Wolves chairman Jeff Shi chuan tunhnaia an chetchhiat chu Lage an ban chhan a nih thu sawiin thutlukna awlsam a nih loh thu a sawi.
“Bruno hi coach tha tak, manager inpe leh thawkrim tak a ni. Ani leh a staff te hi thawhpui nuam tak an ni a, chuvangin he thutlukna siam hi a harsa hle.” tiin a sawi.
Lage thlaktu atan hian a hnampui Ruben Amorim hming a ri ring nghal a, Julen Lopetegui, Paulo Fonseca leh Sean Dyche te pawh sawi an ni.