Aizawl: Mizoram Pradesh Congress Committee (MPCC) chuan Khawchhak Tlangdung Fan programme chu nimin atang khan tanin Keifang Kawn, Saitual District-ah bul an tan a. He hunah hian party president, Lalsawta chuan, ‘Tang Puihna’ chu party ang pawha an kalpui loh tur thu a sawi.
Manifesto pakhatna tlangzarh tak, ‘Tang Puihna’ chungchang sawiin Lalsawta hian, “Party ang pawhin kan kalpui dawn lo a, tang puihna a ni dawn a, tan ngaihna hre lote pawh kan pui dawn,” a ti.
“Kan tlak hma leh tlak hnu pawhin NLUP hna tam tak la par chhuak hman lo kan nei a, kan hria a ni. Mi tam takin an rilru an seng nasa em em a, an dinchhuahna tura rilru seng mi tam takte chu kan pui dawn bawk a ni,” a ti bawk.
MPCC president hian, “Pathian duh zawngin keimahni hi insiam tha ang u, thluaka sum lutte kan nih chuan chutiang chuan min dal anga kan ram kan siam thei lo ang. Him bikin kan inhria em, kan ram tana kan thawhna hi min dal lo a ni. Mizote hi ding chhuak thei lo tura inngaihhniamna kan nei lo, Mizote hi Pathianin min buatsaih danah dingchhuak thei kan ni,” a ti.
“He ram tluchhe mai thei, a letling zawnga ropui taka ding chhuak thei si hi, kei hian he ram tluk chhiat loh nan hian ka thawk thei a ni tih hi kan pawm em? Kan ram ding chhuak tur hian kan za vaiin kan thawk thei, Pathianin kan tum hi min tumpui loh chuan, a ram leh a felna kan zawn hmasak loh chuan kan ding chhuak lo ang, Pathian puih erawh chuan he ram hi kan chhanchhuak thei,” a ti.
He hunah hian MPCC president hian Tawi East leh Tawi West atangin an party-ah mi thar eng emaw zat lawm lut nghalin, Vice President Lal Thanzara leh Treasurer Zodintluanga Ralte, MLA te pawhin thu an sawi bawk.