Lirthei tlan loh nia tlanchhuak an awm leh nual tawh!
Khawpuiah lirthei a tawt chho leh hle tawh mai a, sorkar in tlan loh nite siam ve bawk mah se, zawm tam tak an awm laiin, zawm tum lem lo, man theitu lamin an man bawk si loh tlanchhuak an awm leh nual ta mai.
Ke pahnih nei lirthei pakhat chu hmeichhiain a khalh a, duty lamin an man duh lo nge, an ngaihhnathiam tih pawh hriat lohin traffic point pawimawh deuh deuh, pali panga vel a paltlang thei a, hmeichhia a nih avanga ngaihhnathiamna chu a awmah lo ngai ta ila; chak zetin mipain a ke hnih nei lirthei chu a rawn khalh ve fua fua a, a tlan hlauhawm em avangin eizawn nana hmang lirthei khalhtu pakhat phei chuan a lo kam khat hial. Mahse, a vung ngaiin a vung reng tho!
Chumite pahnih chu chiang deuha an tlan loh nia tlanchhuak, traffic point pawimawh em em pali panga bawr vel lai paltlang an ni. Darkar thuah nise, an tlan theih hun a liam var var tawh. Mahse, man an ni tlat lo! Hlauhawm deuha khalh phei kha chuan mi tihpalh a nei ang tih hlauhawm tak a ni. Ke pali nei lirthei changkang deuhah hian a neitupa leh a driver niawm tak hi an chuang bawk. Mahse, chumite pawh chu an tlan loh nia chhuak tho an ni. Man an ni chuang lo!
Lirthei tam zel karah sorkar in tlan loh nite siamin, zawm hlawh viau mah se, tute emaw thuawih lo man kawngah hian thawk rim lehzual se, phalna nei leh laklawh tak takte erawh a awm theih ngei ang. Chutiang ni lo, dan zawm lo tute hrem kawngah hian an mit tivar zual mawlh teh se.