Aizawl: Hachhek Constituency Development Committee (HCDC)-in Hachhek tlangdunga inkalpawhna kawngpui chhiate thawm that hna a rang lama thawhsak turin sorkar an ngen.
Hemi chungchanga thuchhuah an siamah, “Tuidam leh Darlak inkar, Sabual lui thlang chu a chhiat nasat avangin mipuiten harsatna an tawk mek,” an ti a. Helai kawng chhia hi YMA leh mi tlawmngaiten vawi tam hnatlangin an lo siam tawh tih sawiin, heti chunga sorkarin kawng a la siam tha lo chu pawi an tih thu sawiin kawng chhia avanga lirthei chetsualna leh nunna hial chân phahna a thlen hma ngeia kawng siam tha turin sorkar an ngen.
Hachhek bial chhunga kawngpui pawimawh, siam zawhna la rei lo tak Bairabi – Zamuang (BZ) road pawh a chhe leh hle tawh tih HCDC chuan an sawi a. Hei pawh hi siam thatsaka chakkhai lakna awlsama siamsak leh thuai turin sorkar an ngen bawk.
HCDC chuan Teirei lei siam mek leh Kanhmun leh Damcherra inkalpawhna lei dawh mek pawh a rang lama siam zawh thuai an duh thu sawiin, “Sorkar hian pawisa a nei a, a mipuite a hmangaih takzet a nih chuan a rang lama min siamsak thuai turin kan ngen,” an ti a. An ngenna hi tihhlawhtlin a nih loh chuan an thiam dan ang anga hmalak zel an tum thu an sawi bawk a ni.