ZPM working president K Sapdanga’n politics chu mihausa thenkhatin gambling angah an ngai nia sawiin, “party-ah an buai ve lova, tling tura an rinah sum an thap a, an tlin chuan contract leh supply hna an hmulet leh mai dawn a, heng tireh theitu hi voters kan ni” a ti.
ZPM Tawi East block buatsaih political training, tunkar Thawhtannia Keifang-a neihah he thi hi K Sapdanga chuan a sawi a. Sum sem avanga chak tum te sum sem vanga chaklohtir theitu chu mipui an nih thu sawiin, “kan vote tluka chak a awm lo,” a ti.
K Sapdanga chuan tunhma chuan party chhung ami te chauhin politics an khel a, tunah chuan party pawna mi ten politics an ngaihven tawh niin a sawi a. Party chhung ami te chuan an fak tur leh an ep tur an chiang a, tan lam nei lo te rilru an hrethiam thei lova, an party boruak bak an pawm thei lo nia sawiin, “tu sorkar pawh ni se, mipui an mangan hunah pawh mangan nachang an hre thei lo, party pawn ami te chuan tan lam nei lovin thil an thlir a, tun hi mangan hun a ni tih an hrethiam” a ti bawk.
ZPM working president chuan inthlan lo awm leh tura politics ngaihven nasa ber turte chu sorkar hnathawkte nia sawiin, “an tan chuan politics hi politics a ni tawh lo, an chaw bel a ni” a ti a. Tu nge an hlawh batsak lo ber ang tih an ngaihven lehzual tawh dawn nia sawiin, hlauh an nei tlem tial tial a, an rilru an sawi chhuak ngam tial tial niin a sawi.
ZPM Leaser Lalduhoma pawhin thusawiin, “ZPM-in collective leadership kan nei hi kan hlawkpui a, President, Leader, Working President kan nei hi a hlawkin kan party tan a tha em em a ni” a ti a. “Mi party inrelbawlnaah kan inrawlh lova, kan party inrelbawlnaah party dang kan rawn a tul hek lo, ZPM culture chu Zo nun ze mawi, kristianna nena inrem a ni” a ti bawk.