Leicester City in tun season a vawikhatna atan league hnehna an chang a. An mamawh point thum hmu turin goal li khungin Nottingham Forest chu 4-0 in an hneh.
Foxes hian season bul an tan chhiat avangin chak an mamawh hle a, lehlamah an khingpuite pawh hi tun season a vawi ruk an tlawmna niin manager Steve Cooper-a dinhmun thlengin tunah sawi a ni mek tawh.
King Power Stadium-ah Foxes tan midfielder chhuanvawr James Maddison chuan minute 25-na leh 35-naah goal a khung a. Harvey Barnes chuan minute 27-naah goal mawi a khung ve bawk.
Second half-ah substitute Patson Daka chuan an goal li na a khung a. Brendan Rodgers-a pawlte hian nikum December atanga an chak chian ber tum an hmang.
Lehlamah Forest tan kum 1999 hnua Premier League a East Midlands derby hmasa berah inkhel duhawm lo a ni a, first half-a minute hnih chhunga goal hnih an chhuah hnuah an tan thawh leh ngaihna a awm tawh lo.
Striker Taiwo Awoniyi chuan goal ban pet per ve bawk mahse kum 2004 January hnua a zawna vawi nga an tlawmna a ni a. Premier League kaithar club nimahsela nipuiah player 23 an lei avangin an lakah beiseina a sang a, hei vang hian club neitupa Evangelos Marinakis chuan a ban mai ang em tih zawhna a awm tan tawh.