Aizawl : Faina hapta kal mekah Kawnpui town sanitation committee-in nimin khan Kolasib Bawrhsap hovin Dihmuntlanga bawlhhlawh sawngbawlna hmun -solid waste management centre- an tlawh a. District urban development officer (DUDO) C Lalmuan Puia; SDO (C), Kawnpui Rebecca Laldinmawii Hrahsel leh DIPRO Hmingthanzuala te an tel bawk.
Bawrhsap chuan faina chu hmasawnna leh changkanna tehfung pawimawh tak a nih thu leh faina chuan thianghlimna leh hriselna a ken tel tlat avangin mitinin fai chu ngaihpawimawh thar a tul thu a sawi a. Faina hapta hman zawh hnu thleng pawha fai tura hmalak zel a pawimawh thu a sawi.
DUDO-in Solid waste management centre-a bawlhhlawh sawngbawl na kalpui dan tlangpui sawiin, in tin atanga bawlhhlawh thliar hran that loh avangin a sawngbawl kawngah harsatna a awm thin thu a sawi a. Solid waste manangement centre tihchangtlun zelna turah tuna a kal dana a tha lai leh thalo lai te zirchian a nih thu leh thuneitu sang zawka thlen thin a nih thu a sawi bawk.