German champion Bayern Munich in Czech Republic club Viktoria Plzen hneh turin a tir minute 21 chhungin goal thum an khung hman a. A tawp thlenga chungnung zawk an nihnaah 5-0 a chakin record thar an siam.
Thawhlehni zan UEFA Champions League inkhelah Bayern Munich hian Group C-ah dinhmun sang ber an luah chhunzawm a. Group stage-ah tlawm lova kal zawn rei ber niin match 31 UCL group stage-ah an tlawm tawh lova, Real Madrid in record an siam chu an khum.
Allianz Arena a inkhelah Bayern Munich tan German winger Leroy Sane chuan minute sarihnaah goal a khung a. Minute nga hnuah Serge Gnabry chuan a chhunzawm a, minute 21-naah Sadio Mane-a’n an goal thumna a khung.
Inrinni zana Borussia Dortmund nena Der Klassiker khel tur Bayern hi an Czech khingpuite hian an dang thei lo viau a. Remchang an hmuhah goal na tak takin an nawr fo.
Player rinrawl Thomas Muller leh Joshua Kimmich te Covid 19 avangin chhawr thei lo mahse passing game mawi an khel thova. An khingpuite tan dan theih an ni lo.
Chance tha tak hloh Jamal Musiala chuan goal pawm loh a nei bawk a. Second half-ah pawh tha thlah lovin Sane bawkin an goal li na a khung a. Substitute Eric Maxim Choupo-Moting chuan an goal hnuhnung ber a khung.
Bayern hi Bundesliga-ah a zawna vawi li chak zo lova an kal hnuah Inrinni khan Bayer Leverkusen lakah 4-0 in an chak a, Thawhlehni inkhel a zawh hnuah match hnih atangin goal 9 an khung.
Bayern coach Julian Nagelsmann chuan, “Player-te an kheltha hle a, hetiang rilru pu hian inkhel hmachhawn thin tur kan ni. A tirah goal a lut rang a, kha khan inkhel kal zel kha a hril thui hle.” a ti.
Barca an tlawm
Spain a hmahruaitu Barcelona chu UEFA Champions League group stage pelh zawh loh mai hlauhawmah an awm a. Inter Milan lakah 1-0 a tlawmin match thum atangin point thum chiah an la hmu.
San Siro-ah Barcelona lakah Inter Milan tan Hakan Calhanoglu chuan inkhel a goal awmchhun a khung a, first-half stoppage time-ah team pahnih inkar danglamna a lut.
Bayern Munich laka tlawm tawh Barcelona leh Inter Milan hi karlehah an inkhel leh dawn a, Camp Nou-ah an inkhel tawh ang.
Barcelona hian Champions League inkhel an hmachhawn hnuhnung panga atang pali ah goal an khung lo tawh a. Inter lakah hian ball chang hnem zawk hle mahse Inter in first half-ah chance tha zawk an nei.
Second half-ah Xavi Hernandez-a pawlten chance tha nei ve mahse goal an khung thei lova. Pedri goal khung Ansu Fati handball avangin pawm a ni lova. Huntawp dawnah Denzel Dumfries handball chu pek an ni lo bawk.
Barca coach Xavi, “Kan dinhmun hi a harsa a, a tawpah chauh kan che tha a, tlakchham kan ngah hle. Tunah chuan final pathum hmachhawn kan ni tawh, kan dinhmun a awlsam lo.” tiin a sawi.
Liverpool an chak
Premier League-ah Brighton & Hove Albion lakah chak zo lo mahse Liverpool in UCL-ah hnehna an chang zawn a. Rangers 2-0 in an hneh.
Anfield-ah Trent Alexander-Arnold leh Mohamed Salah ten goal an khung a. Group A-ah pahnihna an hauh mek.
Klopp-a’n inkhel zawhah, “Kan inkhel a tha a, point thum hmuh a pawimawh ber a ni. Tunhnaiah sawiselna kan tawhte hi a awm vek. Kan dinhmun hi a tha ber lova, a lungawithlak loh tih kan hai lo.” a ti.
Group A hmahruaitu Napoli tan tunhnaia che tha Giacomo Raspadori chuan goal hnih a khung a. 6-1 in Ajax Amsterdam an hneh.