Mizote’n saptawng a ziak thu leh hla lama belh tur lehkhabu thar a awm belh a. Mizo kutchhuak saptawng poetry bu ‘Of Younger Days’ tih Dr. Lalbiakdiki Chawngthu ziah chu nimin khan an tlangzarh.
English poetry chi hrang hrang 70 awmna lehkhabu hi SCERT Auditorium, Chaltlang-ah tlangzarhna hun hman a ni a. Laldawngliani Chawngthu, Director, SCERT chuan he lehkhabu hi a tlangzarh.
Lehkhabu tlangzarhnaah hian Book of the Year lawmman lo dawng tawh Mizo writer hlun Lalhruaitluanga Chawngte chuan preview a nei.
Thalaite chauh ni lova thu leh hla lama tui te tana lehkhabu hlu ni ngei tur hi bu khat Rs. 150 a ni a. The Book Cafe, Chanmari, Aizawl atangin lei theih a ni.
A ziaktu Dr. Lalbiakdiki hi Mizoram Christian College a Department of English-ah Assistant Professor ni lai a ni a. MIELS Poetry Club-ah secretary a ni bawk. A poetry ziahte hi kum 2005 leh a hnu lam amite niin kum 2017 thlenga a ziahte pawh a tel.