Tata Yodha 4×4 LPS Pro Fight champion panga zinga pahnih chu boxrec ranking-ah India number one an ni a, Organising Committee chuan kum tharah ropui zawka huaihawt an tum.
Thawhlehniah LPS office, Zarkawtah chairman Lalsawmliana Pachuau hovin September 30-a, zawh tak, Tata Yodha 4×4 LPS Pro Fight an thlir let a, kawng hrang hranga championship-a telte leh boxer-te hmasawnna avangin lawmawm an ti hle.
Tuipui tlangval Lalrinngheta’n F Zoramchhana lehthal in super bantamweight-ah a champion a, professional boxing vawi hnih chiah la khelin a chak zawn.
Kum 20 mi hi Zotea a hneh avangin a invawrh phah a, an weight-a Indian boxer 34 awm zingah Boxrec ranking-a sang berah a inhlangkai a, pakhatna atangin pahnihnaah Cherhlun chhuanvawr Zotea a chhuk thla ve thung.
Vanlalawmpuia’n Boxrec ranking-ah Indian super lightweight number one a nihna a humhim a, final-ah HC Lalramfela a hneh. Mizo zinga professional boxing khel tam ber ni nghalin, vawi riat a khelh tawhah tum ruk chakin vawi khat a tlawm a, mi pakhat nen an inhnehtawk a ni.
Super welterweight-ah C Lalhruaitluanga’n professional huanga hnuhma tha a neih tipungin final-ah Zomuansanga a hneh bawk. Chawngtlai fighter hi tlawm nei lova tum nga a chak zawnna a ni a, boxrec super welterweight-ah Indian boxer inziak lut 54 an awm a, pakuana a luah chho.
Flyweight-ah Lunglei Ramthar rawlthar Laldinsanga a champion a, vawi li a khelhah knockout vekin a chak. Boxer tha bera thlan niin professional tum hnih a khelh tawhah knockout ve vein a chak zawn mek. Khawvel puma professional boxing record chhinchhiahna boxrec ranking-ah India atanga flyweight boxer 13 an awm a, pahnihna a inhung.
Super featherweight final-ah Chaltlang boxer Lalrosangzuala’n Yuri Lalbiakdika Sanate a hneh a, professional vawi hnih a khelh tawhah a chak zawn. An weight-ah Indian boxer 34 awmin boxrec ranking-ah 11-na a ni.
Organising Committee chuan professional huanga Mizo boxer-te hmasawnna chhuanawm a tiin phurna sang tak a neih phah a, India- rama promoter zingah LPS Promotion chu fal takin number one a ni mek bawk.
Kum tharah Mizo boxer-te tan Pro Fight buatsaih leh ngei a tum a, a aia ropui zawka huaihawt theih dan tur ngaihtuah zui ni se a ti a; thenawm state atangin tel ve theihna remchang siamsak tura ngenna a dawng a ni.
Hun harsa kara tel, boxer leh referee leh judge, sum thawhtu sponsor, hun hmanpui tura sawm bik, thawktu dang, boxer-te thilpek petute bakah, boxing ngai hlutu Mizo mipui chungah lawmthu a sawi tak zet.
Pro Fight denchhenin Mizo referee leh judge 11-in LPS Promotion hma laknain Indian Boxing Council hnuaiah license an hmu thei a, Mizo zinga professional referee leh judge hmasa ber an ni. Mizo boxer 20-in boxrec-ah hnuhma an neih phah bawk a, heng zinga 15 hi a hmaa professional boxing la khel ngai lo an ni.