MPCC President Lalsawta chuan dinchhuah tuma tan la mekte puih hi nuam an tih thu leh an tanpui zel dawn tih sawiin, “Chu chu kan manifesto lian ber pawh a ni bawk,” a ti.
MPCC elected office bearer-te Mizoram district hrang hrang tlawh chhuah programme hman mekah khawchhak tlangdung an fang mekah Thawhlehni khan Keifang kawn, Saitual district-a hun an hman hnuah nimin khan Zaingen Branch YMA hall, Khawzawlah vantlang inkhawm an buatsaihah he thu hi Lalsawta hian a sawi a ni.
Congress an sorkar a nih chuan thlai chin uarna hmun bik area an siam ang a, chung thlai chingtute mamawh leh an mamawh intawmte chu |ang Puihna hmangin an pui dawn niin Congress president hian a sawi a, “|anpuina hi nuai bi atanga mamawh intawm, kawng, electric, tuilak, etc siam nan vaibelchhe tel thlengin kan tanpui dawn,” a ti a, an ruahmannate chu sawisel thin ni mah se an tihhlawhtlin tur thu a sawi.
MPCC Vice President Lal Thanzara pawhin thu sawiin, “Kan ram dam lo mek hi a tidam theitu chu Congress Party hi kan ni,” a ti a; ram tihdam rawngbawl hna thawhpui turin Mizoram mipuite a sawm a. Tunah hian tihpalh sorkar ramin a hrawn mek a, kum 2023 inthlan lo awm turah hian tihpalh sorkar an awm tawh lohna turin nasa taka tan la turin mipui a sawm.
Lal Thanzara hian, “Chief minister ni thei tur party leader pathumte hi en ula, ei ru ngai lo, sum enkawl thiam, mi rinawm Pu Lalsawta aia thlan tur zawk reng reng an awm lo. Rorelna dik lo hnuaia kan awm mek hi siam that kan duh a, kan ram dam lo tidam tur hian thawhpuiah Mizoram mipuite ka sawm a che u,” a ti.
Thusawitu dang, MPCC Treasurer Zodintluanga Ralte, CLP Leader chuan, “Kum 20 chhung rambuaia kan awm avanga rethei em em a kan awm laia remna thlen a, hmasawnna bul tantu, rangva inchung nei lote tana rangva sem a, mi rethei zawkte dawmkangtu, tanpuitu chu Congress a ni,” a ti.
Zodintluanga Ralte hian MNF party-in Mizoram an enkawl danah mipui an lungawi lo tih sawiin, “Mi dik leh tha, sorkar hnathawk a nih lai leh minister a nih lai pawha sawisep kai lo Pu Lalsawta a lo lang a, Congress Party-ah mipuiin rinna an nghat chho ta tlat. Minister leh MLA eiru a awm chuan ka bân ang ti ngam hruaitu kan nei a. Chutiang chu party dangin hruaitu an nei ve lo,” tia sawiin, that loh theih lohna bawm hi an din ngei dawn niin a sawi.
MPCC Elected OB-in tun tuma Khawchhak Tlangdung Fan Programme an neihah hian Saitual leh Khawzawlah MPCC Presdient Lalsawta’n an party-ah mi thar eng emaw zat a lawm lut a ni.