Indian maktaduai tel chuan Hindu sakhaw kût pawimawh ber pakhat, Dussehra chu Covid-19 inkai darh hlauhna awm lovin an lawm veleh thei ta.
Kum hnih liam ta khan hripui leng avangin duh ang tawkin an lawm thei lo va, lawmna thawm a ri lo va, punkhawm khap a ni bawk.
Dussehra hi lunar calendar-a thla sarihna, ni 10-ah lawm thin a ni a, khawvelin calendar a hman tlanglawnah hi chuan September leh October thla a ni tlangpui.
Kût hi Hindu pathian, Ram-a’n thlarau sual lalpa lu 10 nei, Ravan-a a hneh lawmna niin thatnain sual a hneh entirna a ni.
Dussehra hi kum tin India ram pumah chi hrang hrangin lawm thin a ni.
A lawmna hi ni eng emaw zat chhung awh a ni thin a, an zai a, an lâm a, sakhaw biakna urhsun tak tak pawh an hmang thin.
Chhungkua leh thian intlawh tawn nan te, chithlum leh thilpek inhlan tawn nan te leh hnam inchei dana incheina hun atan an hmang thin.
Hmun thenkhat, Gujarat leh khawi emaw laiah chuan kût hi zan khaw chhung lâmna hun, Navratri an tihin an lawm hmasa a; he hunah hian miin thawmhnaw rawng lar tak tak an inbel a, hnam lâma lamin tiang tereuh tê, dandiya an tih an keng a, kut an beng bawk thin.
Kût an lawm ni 10-naah Ravan, a unaupa leh a fapa lim chu thatnain sual a hneh tih entir nan an hal a. He hunah hian pungkhawm an tam zual thin a, lim hal chu deusawh nan leh pathianin hnehna a chan lawm nan halpuah leh hal mawi an hal nasa hle thin bawk.
Tun hma lam chuan halmawi hi an hal nasa thin hle a; mahse, tun hnai kum eng emaw ti chhung hi khuarel humhalhtu leh politician tam takin khuarel himna atan a that loh bakah boruak a tibawlhhlawh nasa nia an sawi avangin khap a ni thin a, uar taka hal a awm tawh meuh lo.
India hmar lamah chuan Dussehra pual hian Ramlila an tih, Ram-a nun lantirna dawhsana chan chi lemchan chu khawpui leh khaw hrang hrang chhuah thin a ni a. A changtute chu Hindu sakhaw lehkhabu, Ramayan-a lang mi hrang hrang angin an chang chhuak a, lawm a hlawh thin hle.
He kût hi Durga Puja tawpna a ni nghal bawk a, pathiannu Durga-i’n lawi ramhuai, Mahishasur a tuk tlawm entirna a ni.
Kût lawmna atan hian pandal an sa a, mi an pung khawm a, theme chi hrang hrang, politic atanga lemziah pawimawh thlenga pho chhuah thin a ni.
Dussehra hi Durga Puja tawpna a nih rualin Diwali lawmna tura inbuatsaihna intanna a ni nghal bawk a. Diwali hi êng kût niin Dussehra atanga ni 20-a lawm thin a ni.