Mizoram University-a Mizo Deptt. leh Union Ministry of Culture tangkawpin nimin khan Millennium Centre chung zawlah Evolution Fest, Pocal Products Expo an buatsaih a, Commerce & Industries Minister Dr. R. Lalthangliana’n a hawng.
Hawnna inkhawmah Dr R Lalthangliana chuan sorkar hnain mi zawng zawng a daih meuh loh avangin thiamna bik neiten eizawnna an dap chhuah zel a ngai tih sawiin, chung atan chuan sorkar department hrang hrangten mahni kutkea eizawnga thiamna neite pho chhuahna platform chu an ngaihtuaha hma an lak zel a tul tih a sawi.
Commerce & industries minister chuan thiamna tak tak neite tan hna zawn kawngah harsatna a awm loh thu sawiin, “Hnain a zawng zawk,” a ti.
Local products expo buatsaih chu tha a tih thu sawiin Mizorama thil thar chhuah leh siam chhuahna hmun, stall 20 vela thil chi hrang hrang – painting, thil lem siam, hnang leh mau atanga kawr siam, food processing products, handloom leh thil dangte pho chhuah a ni chu ropui a tih thu sawiin, “Vawiin programe hian thil thar a hring chhuak dawn,” tiin a sawi.
India-in zalenna a hmuh kum 75-na lawmna Azadi Ka Amrit Mahosav peng pakhat local expo-ah hian stall 20 a awm a, Art Novelty, Tawlh-loh, Tlaizawng, Lelen Sunhlu Products, Local leh a dangte an inpho chhuak a ni.