India ram chin Himalaya tlangdunga vur tawlhin tlang lawm mite a chhilhah mi 10 vel an thi a, mi dang eng emaw zat chin hriat lohvin an la awm bawk.
Uttarakhand-a chhiatna thleng tawngtute hi tlang lawn zirlai mi 34 leh anmahni kaihruaitu mi pasarih an ni.
Police chuan mi 14 chhanchhuah an nih tawh thu leh mi 20 dawn chin hriat lohvin an la awm thu an sawi.
Tlang lawn mite hi a tirah chuan khurah a hnawl lut nia sawi a ni a. Indian Air Force sipaite pawhin chhanchhuah hna thawh hi an pui.
Chhiat tawkte hi an chhiat tawhna bul lawka Nehru Institute of Mountaineering-a zirlai leh kaihruaitute an ni a. Mount Draupadi Danda-2 (5,670m; 18,602 feet) atanga an let leh lam chu vur tawlh hian a hnawl ta a ni.
Thuneitute chuan Thawhlehni zing dar 9:30 velah thil thleng an hriat thu an sawi niin chhanchhuah hna thawktute chuan an sawi.
Thawhlehni zanah zawn hna thawh chu ruah sur leh vur tla avangin chawlhsan a ni a, Nilaini tuk atangin an chhunzawm lehnghal a ni.
Uttarakhand police chief Ashok Kumar chuan chhanchhuah hna thawktute hi khaw awm dan a ziaawm hnuah chauh an che chhuak leh thei niin ANI news agency hnenah a sawi a. “Vawiin (Nilaini)-ah ruang paruk kan hmu a, ruang 10 kan hmu tawh a ni,” a ti.
A hmain Kumar hian Indian Air Force-in thlawhna atangin tlang hi en kualin chhiatna thlenna hmun hi thlen mai awlsam lo tak a nih thu an sawi tih Reuters news agency hnenah a lo sawi tawh.
Defence Minister Rajnath Singh chuan Twitter-ah, “Nehru Mountaineering Institute, Uttarkashi-a miten tlang an lawnnaa lei tawlh avanga chhiatna tawka nunna hlu tak chân a ni hi pawh ka ti tak zet a ni,” tiin a tar lang.
Uttarakhand-a chhiatna thlenn hma chawlhkarah khan US ski mountaineer Hilaree Nelson chu Nepal ram chhunga Himalaya-ah a ruang chhar a lo ni tawh bawk.
Nelson-i hi chhuan kal mekah tlang lawn mi ropui ber pakhat a ni a, Mount Manaslu a lawn chhuah hnuah tlanga lei kak thuk taka a tla lut nia sawi a ni.
Nelson-i’n chhiatna a tawh niah chiah tho hian a tawhna tlangah tho hian vur tawlhin mi pakhat a thi a, eng emaw zatin hliam an lo tuar bawk.