Aizawl : Larsap Hari Babu Kambhampati-a’n thawhlehni khan autonomous district council pathum – LADC, MADC leh CADC hotute kawmin, ADC hnuaia hmasawnna ruhrel tam zawk thawh a nih theihna turin zaa za, central sorkarin senso a tumna tur project nasa zawka dap turin a chah.
Larsap chuan ADC-in hmasawnna ruhrel siamna tur sum a nei tam tawk lo tih a hriatpui thu sawiin, “ADC pathum hnuaiah hmasawnna ruhrel tam zawk thawh a nih theihna turin zaa za central sorkarin senso a tum tur project te nasa zawkin dap rawh u,” a ti a. Hemi kawngah hian nodal department – District council & minority affairs te nen thawhhona tha tak an neih a tul thu a sawi.
Sum hman dana fimkhur a tul thu leh ADC pathumah te mipui tana sum hman dan endiktu committee din ve tha a tih thu Larsap chuan a sawi a. ADC pathum leh a kaihhnawih department hotulu te chu an hmalaknate thlirlet leh an harsatna sutkian dan tur te ngaihtuahhova kumtin vawi 1 tal an thutkhawm thin tha a tih thu a sawi bawk.
Larsap hova thutkhawmah hian ADC hmalakna kaihhnawih department – District council & minority affairs department, Finance department, Planning department leh Principal accountant General office hotute pawh an tel a. ADC pathum ten account statement an thehluh chungchangte, staff recruitment chungchang leh harsatna an tawh mek sutkian dan tur te sawiho nghal.
State sorkar-a secretary ten an sawi danin ADC pathum tana budget ruahmanna chu 2nd Mizoram finance commission-in rawtna a siam hunah a hriat theih dawn a ni.
ADC atanga rawtna hrang hrang thehluh tawh zing ami CEM, EM leh MDC te hlawh tihpun chungchang chu Council of Ministers thutkhawma rel tura rawt a ni tawh a. ADC huam chhungah project proposal thenkhat thehluh mai tura buatsaih fel tawh chungchangte pawh Larsap hova thutkhawm hian an sawiho bawk.