Aizawl: Mizoram Florists’ Association (MFA)-in an kum 25 tlin lawmna kal zela Aijal Club Park-a Silver Juibilee Flower Show-cum-Fair an buatsaih chu nimin khan Deputy Chief Minister Tawnluia’n a hawng.
Hawnna inkhawm an pawl Vice President Dr Lalkailiani kaihhruaiah deputy chief minister chuan pangpar chingtute leh zuartute tana pawl dinin an thil tum zingah pangpar chin, khawi leh zawrh kawngah sorkar hmalakna thlawp tlat an tum chu lawmawm a tih thu a sawi.
Deputy chief minister chuan pangpar khawi chu SEDP trade-ah dah a nih thu sawiin, “Sorkarin mipuite dinhmun chawikanna tura hmalakna a neih mek SEDP-ah pangpar chin leh zawrh kawnga eizawnna ngelnghet siam hi a tel ve,” a ti.
Mizoram chhunga mi ngei pangpar chi hman ni se, loh theih lohah chauh state pawn atanga lakluh ni se tia association hmalakna chu lawmawm tiin, ram hmangaihtu rilru a nih thu Tawnluia chuan a sawi.
Silver Jubilee Flower show-cum-fair hawnna inkhawmah hian MFA President Lalnuntluangi, Horticulture Department-a Additional Director L. Lalhmingmawia leh flower show endiktu tura ruatten thu an sawi.
October 8 thleng awh tur flower show-cum-fair hi horticulture department-in a sponsor a, MFA tan khuallianin Rs. 20,000 a pe bawk.
Mizoram Florists’ Association hian an din champha kum 25-na lawmna programme hrang hrang an buatsaih mek a. Ei siam zirna leh pangpar khawi zirnate pawh an buatsaih tawh a, a lawmna pui ber chu November-ah neih an tum a. Kum 1998-ah pawl danpui nei tanin general assembly hmasa ber an nei a ni.