Mahindra Pickup 4×4 LPS Pro Muaythai -ah Mizo fighter 108 an tel a, vawiinah LPS office-ah fixture tar chhuah a ni ang.
Thawhlehni khan Zarkawt Recreation Centre, Aizawlah tel tumte hriselna endikin an inbuk a, form theh lut 126 atangin khel thei turin 108 ziah luh an ni.
Muaythai Association of Mizoram hruaitute chuan form thehlut zinga mi 18-ten tunhnaiah hliam leh damsam lohna an neih bakah engemaw harsatna dang avangin an tel thei dawn lo tih an sawi.
Chutihrualin senior huang inelnaah mi 110 deuhthaw an inlan thei tur chu Mizoram Muaythai tan thil ropui tak niin an hria a, inbeihna hmuhnawm tak a ni ngei dawn tih a chiang a, Muaythai inelna a la tel ngai lo eng emaw zat an tel bakah Mizo fighter thate an tel kim hle niin an sawi.
Weight hrang panga zingah kg 48 atanga 54 inkar bantamweight-ah 35 telin an tam ber a; a chung chiah kg 54 atanga 63.5 inkarah lightweight-ah 31; kg 48 hnuai lamah 24, kg 63.5 atanga 71 inkar welterweight-ah 14 leh kg 75 chin chung lamah mi pali an tel a ni.
Vawiin zing dar 10-ah LPS office, Zarkawtah fixture tar chhuah a ni dawn a, a tuk October 7, Zirtawpni zanah R Dengthuama Indoor Stadium, Mualpuiah tan a ni ang a, October 28-ah final tura ruahman a ni.
Muaythai cage fight-ah hian show awm zan apiangin D3 Haier Fighter of the Night lawmman sem a ni dawn a, final zanah D3 LG Best Fighter, D3 LG Promising Fighter, D3 LG Best Judge leh Referee hnenah lawmman tha tawk tak pek a ni bawk ang.