Mizoram Zirlai Pawl (MZP) Gen. Hqrs hruaituten nimin khan Mizoram Chief Minister Zoramthanga chu a pisa-ah kawmin ramri chungchang te, NHIDCL kawng siam chhe lutuk chungchang te, Zo hnam khawmpui lian Zofest 2022 chungchang leh thil pawimawh hrang hrang an sawipui.
MZP hruaitute hian tun hnaia Assam sorkarin Bairabi Zophaia status quo chhunga kut an thlak a, thlam pahnih an sak chungchangah rang taka hma a lak avangin chief minister chu lawmthu an hrilh a. Assam chet dan chu uluk taka thlithlai reng a ngaih thu leh an hmalakna chu na taka chhang let vat zel turin an ngen.
NHIDCL-in Mizoram hmun hrang hranga kawngpui a siam mekte sulhnu a chhiat thu thlen bawkin, a bik takin an lung hman chuan duhthu a sam loh avangin hma la turin MZP chuan chief minister an ngen a. Chief minister chuan a lo en zui tur thu leh a concern ministry pawh sawipui a tum thuin a lo chhang.
MZP chuan Thangram Indigenous Peoples Movement (TIPM)-in an chenna, 180 sq. miles-a zau Mizoram state chhunga rin lut tura an hmalakna chu a theih ang anga hmalakpui turin an ngen nawn bawk a. Sorkarin theih ang anga hma a lak mek thuin a lo chhang bawk.
Zo hnam inkhawmpui lian, Zofest kum 2002 atanga lo hman tawh chu kumin December 6-9 chhung hian Thenzawlah hman a tum thu sawipui bawin, a hlawhtling theih nana theihtawp a chhuahpui tur thu a lo hrilh a ni.