Khawvela Salvation Army hotulu ber, General Brian Peddle-a’n kum thar January thlaah Mizoram a rawn tlawh dawn.
Nimin khan Salvation Army hotuten Aizawl Press Club-ah thuthar thehdarhtute kawmin General Peddle-a’n Mizoram a tlawh tur thu hi an puang a, hun an hman dan tur ruahmante an sawi bawk.
General’s Visit Communication & Doumentation Sub Council Chairman Maj Reuben Lalnunthara’n general chu January 30, 2023-ah Mizoram lo thleng tura ruahman a nih thu sawiin, a cham chhungin February 1-5 chhunga India Eastern Territory, Territorial Congress a hmanpui ang a, Phunchawng-a Salvation Army biak in thar a hawn bakah sorkar hotute a kawm dawn niin a sawi.
Maj Reuben Lalnunthara chuan General Peddle hian kum 2020 khan India Eastern Territory tlawh a tum tawh a, COVID-19 vangin a thulh a, hri a ziaawm tak avangin nakuma rawn kal a tum ta tih a sawi a. General lo dawngsawng tur hian kawng hrang hranga an inbuatsaih thu leh sipai pawl member-te pawh an phur hle thu a sawi.
General Peddle hi Canada chhuak niin, general 21 ni turin May 24, 2018 khan International High Council-in a thlang a, India Eastern Territory a tlawh hunah hian a nupui, Commr. Rosalie Peddle-i’n tawiawm tura beisei a ni.
The Zozam Times zawhna chhangin Salvation Army hotute chuan kum 2014-a The Salvation Army chhuahsana pawl thar dinte chu an hnenah lo let leh se an duh a, an pawm thei reng tih an sawi a. Chutihrual chuan an rawngbawlna zawm thei lova chhuak tate chu an hnena tel leh tura sawm an ni lo va, inzawmkhawm tumna lam hawia hmalakna pawh a awm lo niin an sawi a. Tun dinhmunah Salvation Army chhungkuaah boruak chhia a awm loh thu an sawi bawk.
Salvation Army India Eastern Territory huam chhungah hian member 60,000 chuang an awm mek a, territory-ah hian division sarih leh district hqrs. pakhat a awm a ni.